Рим. 22 қазан. Интерфакс. Белградтағы скупщина (Сербия парламенті) ғимараты алдында сәрсенбі күні атыс пен өрт шықты. Оқиға салдарынан бір адам ауыр жарақат алды, деп хабарлады сербиялық РТС телерадиокорпорациясы.
Сербияның денсаулық сақтау министрі Златибор Лончардың айтуынша, қарулы белгісіз адам ел президенті Александр Вучичтің жақтастары орналасқан шатырлы лагерьге оқ жаудырып, бір адамды ауыр жаралаған. Жараланған азамат ауруханаға жеткізіліп, оған ота жасалмақ.
Министрдің мәліметінше, шабуыл жасаған адам лагерьдегі шатырды өртеп жіберген. Күдікті дереу қолға алынды.
«Ер адам бірнеше рет оқ атқан, ал оқ-дәрісі таусылған соң өрт қойған. Жараланған адамның жағдайы өте ауыр. Оның өмірін сақтап қалуға үміттенемін, бірақ нақты айта алмаймын – бәрі операцияның нәтижесіне байланысты. Біз қалайша мұндай деңгейге жеттік – басқа пікірдегі адамдарға шабуыл жасалатын жағдайға? Бұл – бәріміз үшін соңғы ескерту. Мұндай жағдай қайталанбауы тиіс, әйтпесе елде өте күрделі мәселелер туындайды», – деді Лончар.
