Душанбе. 8 қазан. ИНТЕРФАКС – Тәжікстанның Экономикалық даму және сауда министрі Абдурахмон Абдурахмонзода мен Корея Республикасының халықаралық ынтымақтастық агенттігі (KOICA, Korea International Cooperation Agency) Жаһандық көшбасшылар бағдарламасы департаментінің атқарушы директоры Ким Ён Ран сауда-экономикалық байланыстарды дамыту, инвестиция тарту және жаңа бірлескен жобаларды іске асыру мәселелерін талқылады, деп хабарлады министрліктің баспасөз қызметі.
Кездесуде экономика салаларын цифрландыру, жоғары білікті мамандар даярлау, зияткерлік меншік мәселелері және инвестициялық ынтымақтастықты кеңейту жайы сөз болды.
Абдурахмонзода Тәжікстан мен Корея Республикасы арасындағы сауда-экономикалық қатынастардың қарқынды дамып келе жатқанын және өзара сауда көлемінің артқанын атап өтті.
Тәжікстан мен Корея Республикасы арасындағы дипломатиялық қатынастар 1992 жылғы 27 сәуірде орнатылды. Соңғы жылдары екі ел сауда-экономика, инвестиция, энергетика, көлік, цифрландыру және гуманитарлық салалардағы ынтымақтастықты кеңейтіп келеді. Тәжікстан Сыртқы істер министрлігінің мәліметінше, 2024 жылы екі ел арасындағы тауар айналымы 150 млн доллардан асты. Ал Оңтүстік Кореядан тартылған тікелей инвестиция көлемі 100 млн доллардан жоғары болды.
KOICA – Оңтүстік Кореяның Тәжікстанға көрсететін қолдауының негізгі тетіктерінің бірі. Агенттік әлеуметтік-экономикалық даму, техникалық ынтымақтастық және мамандар даярлау бағыттарында жобалар жүзеге асырады. KOICA-ның Душанбедегі ресми өкілдігі 2022 жылғы 21 ақпанда жұмысын бастады.
KOICA-ның қатысуымен Тәжікстанда энергетика, көлік, өнеркәсіп, цифрландыру, мемлекеттік басқару, ауыл шаруашылығы, денсаулық сақтау және адами капиталды дамыту салаларында жобалар іске асырылып жатыр. 2026 жылғы сәуірде электр энергиясы тапшы аудандардағы электр желілерін дамыту жобасының екінші кезеңі басталды. Жоба аясында жаңа қосалқы станция салу және Ромит пен Явроз аудандарындағы 15 ауылды тұрақты электр қуатымен қамтамасыз ету көзделген. Бұл елді мекендерде шамамен 8 мың адам тұрады. Жобаның алғашқы кезеңі 2021 жылы жүзеге асырылған.
Оңтүстік Корея мен Тәжікстан арасындағы ынтымақтастық білім беру және кадр даярлау бағдарламалары арқылы да дамып келеді. KOICA мамандар даярлауға және адами ресурстарды дамыту бағдарламаларын іске асыруға қолдау көрсетеді. Цифрландыру, кәсіптік даярлық, мемлекеттік басқару және кәсіпкерлікті дамыту негізгі бағыттардың қатарында.
Тәжікстанда Корея Республикасының елшілігі жұмыс істейді. Дипломатиялық өкілдік екі ел арасындағы экономикалық және гуманитарлық байланысты дамытуға атсалысады. Оңтүстік Корея тарапы Душанбеде қала инфрақұрылымы мен абаттандыруға қатысты жобаларды да қарастырып келеді. Соның бірі – Тәжікстан астанасында Корей бағын салу жобасы.
Ынтымақтастықтың тағы бір бағыты – «Орталық Азия – Корея Республикасы» ынтымақтастық форумы. Тәжікстан бұл көпжақты алаңға Орталық Азияның басқа мемлекеттерімен бірге қатысады. 2025 жылғы мамырда екі елдің сыртқы саяси ведомстволары арасындағы консультациялар барысында тараптар экономикалық байланыстарды және осы форум аясындағы ынтымақтастықты одан әрі дамытуға мүдделі екенін растады.
