Астана. 5 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Алжир Халық Демократиялық Республикасының президенті Абдельмаджид Теббунға жеделхат жолдап, оны және Алжир халқын Тәуелсіздік күнімен құттықтады. Бұл туралы Ақорданың баспасөз қызметі хабарлады.
«Біз Алжирді араб әлеміндегі сенімді серіктестеріміздің бірі ретінде қарастырамыз. Мызғымас достық пен өзара түсіністікке негізделген қазақ-алжир қарым-қатынасы халықтарымыздың игілігі жолында алдағы уақытта да қарқынды дами беретініне сенімдімін», – делінген Президенттің жеделхатында.
Мемлекет басшысы Абдельмаджид Теббунға жауапты қызметінде табыс, ал достас Алжир халқына бақ-береке мен өсіп-өркендеу тіледі.
