Астана. 19 желтоқсан. Интерфакс-Қазақстан — Қазақстан Президенті Қасым-Жомарт Тоқаев Токио губернаторы Юрико Коикэмен цифрландыру, Smart city технологияларын дамыту, жасанды интеллектті (ЖИ) қолдану және қалалық басқаруға инновациялық шешімдерді енгізу салаларындағы ынтымақтастық мәселелерін талқылады. Бұл туралы жұма күні Мемлекет басшысының баспасөз қызметі хабарлады.
Баспасөз қызметінің мәліметінше, кездесуде мегаполис тұрғындары мен қонақтары үшін неғұрлым қолайлы, экологиялық тұрғыдан орнықты, қауіпсіз әрі инклюзивті орта қалыптастыру мәселелері де қарастырылды.
«Мемлекет басшысы екі астананың қалалық басқаруға жасанды интеллектті енгізу бағытындағы ынтымақтастығында үлкен әлеует бар екенін атап өтті», — делінген хабарламада.
Сондай-ақ кездесу барысында Тоқаевқа Токио қаласының Smart city тұжырымдамасы таныстырылды. Аталған тұжырымдама өмір сапасын арттыруға, басқару тиімділігін күшейтуге және орнықты дамуды қамтамасыз етуге бағытталған озық технологияларды пайдалануды көздейді.
Қазақстан Президенті Жапонияда ресми сапармен жүр.
