Астана. 20 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Испания королі VI Фелипені және испан халқын ұлттық құраманың 2026 жылғы футболдан әлем чемпионатында жеңіске жетіп, тарихында екінші рет әлем чемпионы атануымен құттықтады. Бұл туралы дүйсенбі күні Ақорданың баспасөз қызметі хабарлады.
«Ұлттық құрамаларыңыздың жоғары шеберлігі, ұйымшыл командалық ойыны және жеңіске деген жігері миллиондаған жанкүйердің таңданысын тудырды. Футбол саласындағы Испанияның әлем мойындаған озық тәжірибесі басқа мемлекеттер үшін үлгі бола алады», – делінген Президенттің құттықтау жеделхатында. Оның үзінділерін Ақорданың баспасөз қызметі жариялады.
«Осы мүмкіндікті пайдалана отырып, биыл Қазақстанда “Атлетико Мадрид” клубының академиясы ашылғанын ерекше атап өткім келеді. Бұл бастама халықтарымыз арасындағы достық пен көпқырлы ынтымақтастықты нығайтуға, сондай-ақ жастар арасындағы байланысты дамытуға тың серпін береді деп сенемін», – делінген жеделхатта.
Қазақстан Президенті VI Фелипеге игі бастамаларына табыс, ал достас Испания халқына амандық пен өркендеу тіледі.
2026 жылғы футболдан әлем чемпионатының финалында Испания құрамасы Аргентина құрамасын 1:0 есебімен жеңді. Осылайша Испания өз тарихында екінші рет әлем чемпионы атанды. Бұған дейін испандықтар 2010 жылы әлем чемпионы болған.
2026 жылғы әлем чемпионаты АҚШ, Канада және Мексикада өтті. Турнирге 48 ұлттық құрама қатысты. Бұл – әлем чемпионаттары тарихындағы рекордтық көрсеткіш.
