Астана, 23 қыркүйек. Қазақстан Президенті Қасым-Жомарт Тоқаев БҰҰ Бас Ассамблеясының 80-сессиясы аясында Нью-Йоркте Еуропалық кеңес президенті Антониу Коштамен келіссөздер жүргізді. Бұл туралы Мемлекет басшысының баспасөз қызметі хабарлады.
Кездесу барысында Тоқаев Қазақстанның Еуропалық одақпен ынтымақтастықты одан әрі дамытуға табанды екенін, бұл жұмыс екіжақты негізде де, сондай-ақ C5+ форматы аясында да жалғасатынын атап өтті.
Әңгіме кезінде саяси диалогтың жоғары қарқынмен дамып келе жатқаны айтылды. Бұл өз кезегінде Қазақстан мен ЕО арасындағы сауда-экономикалық, инвестициялық және мәдени-гуманитарлық байланыстарды кеңейтуге ықпал етуде.
Тараптар халықаралық және өңірлік күн тәртібіндегі өзекті мәселелер бойынша пікір алмасты. Кездесу қорытындысында өзара тиімді өңіраралық ынтымақтастықты кеңейту мақсатында байланыстарды жалғастыру жөнінде келісімге қол жеткізілді.
