Астана, 23 қыркүйек. Қазақстан Президенті Қасым-Жомарт Тоқаев БҰҰ Бас Ассамблеясы сессиясының аясында Нью-Йоркте Бразилияның Embraer әуе өнеркәсібі компаниясының президенті Франсиско Гомес Неттомен кездесті. Бұл туралы Мемлекет басшысының баспасөз қызметі хабарлады.
Кездесудің негізгі тақырыбы жүк тасымалын дамытудағы ынтымақтастық болды.
«Қазақстан Президенті еліміздің Еуразия кеңістігіндегі негізгі көлік-логистикалық хабқа айналуға ұмтылып отырғанын атап өтті», – делінген хабарламада.
Әңгіме барысында Қазақстанда Embraer ұшақтарына техникалық қызмет көрсететін өңірлік сервис орталығын ашу мүмкіндігі де қаралды.
Компания басшысы Қазақстанның транзиттік-транспорттық әлеуетін жоғары бағалап, өзара тиімді серіктестікті жалғастыруға дайын екенін жеткізді.
Embraer 1969 жылы Бразилия үкіметінің қолдауымен құрылған. Бүгінде компания Boeing пен Airbus-тан кейінгі әлемдегі үшінші ірі коммерциялық ұшақ өндірушісі болып саналады.
