Астана. 17 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Балқаш атом электр станциясын, сондай-ақ екінші АЭС-ті салу елдің энергетикалық әлеуетін арттырады деп есептейді.
«Балқаш АЭС-ін, одан кейін екінші атом электр станциясын салу Қазақстанның энергетикалық әлеуетін сөзсіз күшейтеді. Сонымен қатар бұл ядролық энергетика сияқты аса маңызды салада жаңа құзыреттердің қалыптасуына ықпал етеді. Қазақстанның энергетикалық картасында атом станцияларының пайда болуы еліміздің экономикалық дамуының сапалы жаңа деңгейге көтерілгенін білдіреді», – деді Мемлекет басшысы энергетика саласының қызметкерлерімен кездесу барысында.
Президенттің пікірінше, жаһандық ауқымдағы ірі өзгерістер энергетика саласына тікелей әсер етеді.
«Әлемде энергетикалық ресурстар үшін қатаң бәсекелестік өршіп келеді. Біз жаңа талаптарға сай болуымыз керек. Мемлекетке энергетика саласының жаңа буын мамандарын даярлау және саланың әлеуетін жүйелі түрде арттыру міндеті тұр», – деді Қасым-Жомарт Тоқаев.
Қазақстанда бірнеше атом электр станциясын салу жоспарланып отыр. Алғашқы АЭС-ті «Росатом» компаниясы салады. Құрылыс шамамен 11 жылға созылады деп күтілуде және станцияны 2035–2036 жылдары пайдалануға беру мүмкін.
