Астана. 17 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев бұған дейін Ресеймен бірлесіп іске асыру жоспарланған Көкшетау, Семей және Өскемен қалаларындағы жылу электр орталықтарының (ЖЭО) құрылысының созылып кетуін қабылдауға болмайтын жағдай деп бағалады.
«Сонымен қатар Курчатов қаласында жылу электр станциясын, ал Көкшетау, Семей және Өскемен қалаларында жылу электр орталықтарын салу қажет. Бұл нысандардың барлығы “таза көмір” технологиясы негізінде жұмыс істеуі тиіс. Алайда аталған жобалардың жүзеге асырылуы созылып жатыр, мұны жол беруге болмайды деп есептеймін», – деді Мемлекет басшысы энергетика саласы қызметкерлерімен кездесуде сөйлеген сөзінде.
Президент Қазақстанның көмір қоры мол екенін атап өтіп, бұл артықшылықты тиімді пайдалану аса маңызды екенін айтты. Оның пікірінше, елдің табиғи ресурстары мен өндірістік әлеуетін ескере отырып, Қазақстан басқа мемлекеттерден электр энергиясын сатып алмауы тиіс.
«Түптеп келгенде, бұл – ұлттық қауіпсіздік мәселесі. Елдің орасан зор энергетикалық мүмкіндіктерін тиімді іске қосу қажет. Қазақстан жыл сайын өндірілетін көлемі 110 млн тоннадан асатын көмірдің елеулі қорына ие. Бұл стратегиялық артықшылықты тиімді пайдалану аса маңызды. Көмірмен жұмыс істейтін электр станцияларының тиімділігін айтарлықтай арттыруға мүмкіндік беретін заманауи “таза көмір” технологияларына көшу үдерісін жеделдетуіміз керек», – деді Қасым-Жомарт Тоқаев.
Қазақстан бұған дейін Ресеймен бірлесіп Семей қаласында (360 МВт), Өскеменде (360 МВт) және Көкшетауда (240 МВт) үш көмірмен жұмыс істейтін ЖЭО салуды жоспарлаған болатын. Жобаларды жүзеге асыруға бас мердігер ретінде «Интер РАО» компаниясын тарту көзделген. Қазақстанның Энергетика министрлігі негізгі қаржыландыру тетігі ретінде Ресей үкіметінің несиесі мен оны субсидиялау қарастырылғанын мәлімдеген еді.
Алайда шілде айында Қазақстан Премьер-министрінің орынбасары Роман Скляр «Интер РАО» аталған жобалар бойынша экспорттық қаржыландыру ала алмағандықтан, Көкшетау, Семей және Өскемен қалаларындағы үш ЖЭО-ны Қазақстанның өзі салатынын хабарлады.
Ал қазан айында «Самұрық-Қазына» ұлттық әл-ауқат қорының басшысы Қайрат Мақсұтов түпкілікті шешім әлі қабылданбағанын айтып, Ресей тарапына бұл нысандардың құрылысына қатысу мүмкіндігі сақталуы ықтимал екенін мәлімдеген болатын.
