Астана. 17 желтоқсан. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен пленарлық отырыста «Қазақстан Республикасының Қылмыстық кодексіне және Қазақстан Республикасының Қылмыстық-процестік кодексіне толықтырулар енгізу туралы» заңды екінші, түпкілікті оқылымда қабылдады.
Мәжілістің әлеуметтік-мәдени даму комитетінің қорытындысына сәйкес, заң медицина қызметкерлерін және жедел медициналық жәрдем көліктерінің жүргізушілерін қызметтік міндеттерін атқару кезінде физикалық күш қолданудан және қатыгездік көріністерінен қорғаудың құқықтық негіздерін жетілдіруге бағытталған.
Түзетулер аясында Қылмыстық кодекске жаңа 380-3-бап енгізіледі. Бұл бапта медицина қызметкерлері мен жедел жәрдем жүргізушілері ерекше қорғалатын тұлғалар ретінде айқындалады. Өзгерістер медицина қызметкерлері мен жедел жәрдем бригадаларының жүргізушілеріне қатысты күш қолдану немесе күш қолданамын деп қорқыту үшін қылмыстық жауапкершілік белгілейді.
Өмірі мен денсаулығына қауіпті емес күш қолданғаны үшін 500-ден 1000 айлық есептік көрсеткішке (АЕК) дейін айыппұл салу, не түзеу жұмыстары, не 600 сағатқа дейін қоғамдық жұмыстар, не 2 жылдан 3 жылға дейін бас бостандығын шектеу немесе айыру жазасы көзделген. Егер әрекет ауырлататын мән-жайлармен жасалса, жаза 3 жылдан 7 жылға дейін бас бостандығын шектеу немесе айыруға дейін қатаңдатылады. Ал өмірі мен денсаулығына қауіпті күш қолдану 5 жылдан 10 жылға дейін бас бостандығынан айырумен жазаланады, ауырлататын мән-жайлар болған жағдайда бұл мерзім 7 жылдан 12 жылға дейін ұлғаяды.
Қылмыс құрамдарын нақты ажырату үшін депутаттар медицина қызметкерлері мен жедел жәрдем жүргізушілеріне күш қолданамын деп қорқытуға қатысты жеке жауапкершілік белгілеуді ұсынды. Бұл жағдайда 200-ден 500 АЕК-ке дейін айыппұл салу, сол мөлшерде түзеу жұмыстары, 300 сағатқа дейін қоғамдық жұмыстар, не 2 жылға дейін бас бостандығын шектеу немесе айыру жазасы қарастырылған. Ауырлататын мән-жайлар болған кезде жаза 2 жылдан 3 жылға дейін күшейтіледі.
Сонымен қатар заңда Қылмыстық-процестік кодекске сәйкес осы санаттағы істер бойынша алдын ала тергеу мен анықтау жүргізу құзыреттері ішкі істер органдарына бекітіледі.
АЕК – айлық есептік көрсеткіш, қазіргі уақытта оның мөлшері 3932 теңгені құрайды.
