Астана. 30 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев елде Қазақстан мемлекеттілігінің іргетасын түбегейлі жаңғырту басталатынын мәлімдеді.
«Ертеңнен бастап ауқымды реформаларға жол ашылады. Мұны жай ғана әкімшілік реформа ретінде қабылдауға болмайды, өйткені бұл – еліміз үшін жаңа тарихи кезең. Біз бұрын-соңды болмаған өзгерістерді жүзеге асырамыз. Басқаша айтқанда, Қазақстан мемлекеттілігінің негізін түбегейлі жаңғыртуды қолға аламыз», – деді Тоқаев сейсенбі күні парламент палаталарының бірлескен отырысында сөйлеген сөзінде.
Президенттің айтуынша, мемлекеттік басқару жүйесінің сапасы жаңа деңгейге көтеріледі.
«Бұл – мемлекеттік қызметте жүрген барлық азаматтың күш-жігерін талап ететін аса маңызды міндет», – деп атап өтті Мемлекет басшысы.
Қазақстанда 1 шілдеден бастап республикалық референдумда қабылданған жаңа Конституция күшіне енеді.
