Астана. 5 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев қазақстандықтарды Ұлттық домбыра күнімен құттықтады. Бұл туралы Ақорданың баспасөз қызметі хабарлады.
Құттықтауында Мемлекет басшысы домбыраны «қасиетті аспап» әрі «ұлттық болмысымыздың ажырамас бөлігі» деп атады.
«Ғасырлар бойы домбыра арқылы халқымыздың асыл адамгершілік құндылықтары дәріптеліп, дәуірлер мен ұрпақтардың сабақтастығы сақталып келеді. Шын мәнінде, домбыра – қуанышта да, сын-қатер кезеңінде де халқымыздың рухын көтеріп, бірлігін нығайтатын ұлттың үні. Домбыраның күмбірінен шабыт алып, алға нық қадам басуға жол көрсететін рухани бағдар табамыз», – делінген Президенттің құттықтауында.
Тоқаевтың атап өтуінше, жаһандық сын-қатерлер күшейіп, дәстүрлі құндылықтардың маңызы әлсіреп жатқан кезеңде домбыра мен Ұлы даланың бай мұрасы қазақ мәдениетінің мызғымас негізіне айналуға тиіс.
«Қазақ домбырасының асқақ әуенін халықаралық қауымдастыққа кеңінен таныту – баршамыздың ортақ парызымыз», – деді Мемлекет басшысы.
Президент Қазақстанда домбыра өнерін дамытып, оны шетелде лайықты дәрежеде насихаттап жүрген домбырашыларға, ұстаздарға және осы салаға үлес қосып жүрген барша азаматтарға алғыс білдірді.
«Қазақтың күйлері мен әндері әрдайым отандастарымыздың жүрегіне жылу сыйлап, бізді Қуатты әрі Әділетті Қазақстанды құру жолындағы жаңа жетістіктерге жігерлендіре береді! Әр шаңыраққа бейбітшілік, бақыт және бақ-береке тілеймін!» – деді Мемлекет басшысы.
Ұлттық домбыра күні Қазақстанда 2018 жылы белгіленген. Мереке жыл сайын шілде айының алғашқы жексенбісінде аталып өтеді.
