Астана, 2 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Палестинаның Жоғарғы сот төрағасы, Президенттің діни істер жөніндегі кеңесшісі Махмуд әл-Хаббашпен кездесіп, екіжақты ынтымақтастық мәселелерін талқылады, деп хабарлайды Мемлекет басшысының баспасөз қызметі.
«Мемлекет басшысы Қазақстан мен Палестина арасындағы дипломатиялық қатынастар орнаған сәттен бастап екіжақты ынтымақтастық достық, өзара қолдау және құрмет рухында дамып келе жатқанын атап өтті. Қасым-Жомарт Тоқаевтың айтуынша, Қазақстан Палестинаның халықаралық қоғамдастықтың толыққанды мүшесі ретінде мойындалуына бағытталған халықаралық бастамаларды дәйекті түрде қолдайды», – делінген сейсенбі күні таратылған ақпаратта.
Баспасөз қызметінің мәліметінше, Президент Тоқаев Қазақстанның Таяу Шығыстағы жағдайды дипломатиялық жолмен реттеу және «екі халық – екі мемлекет» қағидаты негізінде Палестина мемлекетінің құрылуы жөніндегі ұстанымына берік екенін мәлімдеді. Бұл ұстаным Біріккен Ұлттар Ұйымының Жарғысы мен халықаралық құқық нормаларына сәйкес келеді.
Махмуд әл-Хаббаш Палестина Президенті Махмуд Аббастың жеке сәлемін жеткізіп, палестиналық халыққа тұрақты түрде көрсетіліп келе жатқан қолдау мен бейбіт болашаққа деген ұмтылыстарын қолдағаны үшін алғыс білдірді.
Оның айтуынша, Қазақстан Палестина үшін бауырлас ел ретінде танылып отыр. Бұл қарым-қатынас тек екіжақты байланыстарда ғана емес, сонымен қатар БҰҰ мен Ислам ынтымақтастығы ұйымы аясындағы көпжақты форматтарда да көрініс табуда.
Кездесу соңында Қасым-Жомарт Тоқаев Махмуд Аббасқа жылы лебізін жеткізіп, Қазақстанға ресми сапармен келуге шақырды.
