Астана, 2 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Біріккен Араб Әмірліктерінің Президенті шейх Мұхаммед бен Заид Әл Наһаянды және әмірлік халқын Ұлттық күнмен құттықтады. Бұл туралы Мемлекет басшысының баспасөз қызметі хабарлады.
«Мемлекет басшысы жолдаған жеделхатта БАӘ-нің тұрақты даму мен қауіпсіздікті нығайту бағытындағы жоғары беделі жаһандық деңгейде мойындалғаны атап өтілген. Қасым-Жомарт Тоқаев екі ел арасындағы дәстүрлі достық пен өзара қолдау рухындағы көпқырлы ынтымақтастық одан әрі де халықтардың игілігі үшін тереңдей түсетініне сенім білдірді», – делінген хабарламада.
Мемлекет басшысы шейх Мұхаммед бен Заид Әл Наһаянға ел басқарудағы жауапты қызметіне табыс, ал Әмірліктер халқына амандық пен өркендеу тіледі.
