Нью-Йорк, 2 желтоқсан. ИНТЕРФАКС – OpenAI компаниясының бас атқарушы директоры Сэм Альтман қызметкерлерін компанияның басты өнімі – ChatGPT чат-ботының сапасын жақсартуға шоғырлануға шақырды. Бұл туралы The Wall Street Journal басылымы компания ішіндегі құжатқа сілтеме жасап хабарлайды.
Альтманның айтуынша, компания пайдаланушылардың күнделікті тәжірибесін жетілдіру бағытында әлі де бірқатар маңызды жұмыстар атқаруы қажет. Атап айтқанда, жекелендіру мүмкіндіктерін жақсарту, чат-боттың жұмыс жылдамдығы мен жауаптарының сенімділігін арттыру, сондай-ақ ол қамти алатын сұрақтар аясын кеңейту маңызды міндет болып отыр.
WSJ дерегінше, бұл мәселелердің маңыздылығы құжатта «қызыл деңгеймен» белгіленген.
Альтман компаниядағы кейбір басқа бастамалар – жарнама, жасанды интеллект агенттері және Pulse деп аталатын жеке көмекші жобасы – кейінге шегерілетінін мәлімдеді. Ол қызметкерлерді уақытша ChatGPT сапасын жақсартуға жауапты топтарға ауысуға үндеді.
OpenAI-дың ChatGPT бағытына жетекшілік ететін вице-президент Ник Терли дүйсенбі күні X (бұрынғы Twitter) әлеуметтік желісінде компанияның чат-ботты ауқымдауды көздейтінін және оны «одан да интуитивті әрі жекелендірілген» етуге ұмтылатынын жазды.
WSJ мәліметінше, OpenAI қазір жасанды интеллект саласындағы бәсекелестік қысымының артуына тап болып отыр. Әсіресе, Alphabet Inc. құрамына кіретін Google компаниясы өткен айда таныстырған жаңа Gemini моделінің бірқатар сипаттамалары бойынша OpenAI әзірлемелерінен озғаны айтарлықтай алаңдаушылық тудырады.
Сондай-ақ, Anthropic компаниясының өнімдері де пайдаланушылар арасында танымал бола бастаған.
