Астана. 30 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев тамыз айында сайланатын жаңа бір палаталы Құрылтай заң шығару қызметінің сабақтастығын қамтамасыз етіп, Әділетті Қазақстанды қалыптастырудағы негізгі институтқа айналуы тиіс екенін мәлімдеді.
«Құрылтай жоғары заң шығарушы орган ретінде барлық бағыт бойынша сабақтастықты қамтамасыз етуі қажет. Ол көп жылдар бойы қалыптасқан парламентаризм дәстүрін сақтап қана қоймай, оны одан әрі дамытуға айрықша мән беруі тиіс», – деді Тоқаев сейсенбі күні парламент палаталарының бірлескен отырысында.
Президент Құрылтай өзінің заң шығару миссиясын табысты атқарып, қоғамда тәртіп, еңбекқорлық, тазалық және қорғаныс сияқты мызғымас құндылықтардың орнығуына жан-жақты ықпал ететініне сенім білдірді.
«Құрылтай – жаңа форматтағы Қазақстанның маңызды символы. Сондықтан оның құрамына елдің ең үздік өкілдері, шынайы патриоттар, бастамашыл азаматтар мен мемлекетшіл тұлғалар енуі тиіс. Өйткені халық жүргізіліп жатқан реформалардың тиімділігін ең алдымен Құрылтайдың жұмысына қарап бағалайды. Қазіргі депутаттардың бірқатары Құрылтай құрамына еніп, ел игілігі жолындағы қызметін жалғастырады деп ойлаймын», – деді Мемлекет басшысы.
