Астана. 3 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев дүйсенбі күні телекөпір форматында Бейнеу – Сексеуіл автожолының құрылысына, сондай-ақ Қызылорда – Сексеуіл және Ұлғайсын – Сексеуіл автожолдарын кеңейту жұмыстарының басталуына қатысты. Бұл туралы Мемлекет басшысының баспасөз қызметі хабарлады.
Президенттің айтуынша, жалпы ұзындығы 800 шақырым болатын Бейнеу – Сексеуіл автомагистралі халықаралық маңызы бар негізгі көлік дәліздерінің біріне айналуға тиіс.
«Бұл жол Қытай мен Еуропаны жалғайтын “алтын көпірге” айналады. Жоба Қытай шекарасындағы өткізу бекеттерін Ақтау және Құрық порттарымен тікелей байланыстырады. Соның нәтижесінде Қытайдан Еуропаға жүк тасымалының бағыты 1 мың шақырымға қысқарып, жеткізу мерзімі үш күнге дейін азаяды. (…) Басқаша айтқанда, біз еліміздің ғана емес, көрші мемлекеттердің де игілігіне қызмет ететін аса маңызды бастаманы жүзеге асыруға кірісіп отырмыз. Бейнеу – Сексеуіл автомагистралі республикалық, өңірлік және құрлықаралық маңызы бар негізгі көлік артериясына айналары сөзсіз. Сондықтан бұл бағытқа “Арал – Каспий магистралі” атауы өте дәл келеді», – деді Тоқаев.
Сонымен қатар жалпы ұзындығы 774 шақырымды құрайтын Қызылорда – Сексеуіл және Ұлғайсын – Сексеуіл автожолдарының өткізу қабілетін арттыру және оларды кешенді жаңғырту жұмыстары басталады. Жобалар іске қосылғаннан кейін жүк тасымалының көлемі 2,5 есе өсіп, жылына 13,2 млн тоннаға жетеді деп жоспарланып отыр.
Құрылыс жобаларының іске қосылу рәсімінде Мемлекет басшысы Қазақстандағы автомобиль көлігімен тасымалдаудан түсетін табыс көлемі теміржол тасымалының деңгейімен шамалас екенін атап өтті.
«Бүгін бастау алған барлық жобаны белгіленген мерзімде, яғни 2029 жылдан кешіктірмей аяқтау аса маңызды. Ол үшін барлық қажетті жағдай жасалған. Енді оларды сапалы іске асыруға көшуіміз керек. Бірлескен күш-жігердің арқасында алға қойған міндеттерді табысты орындаймыз деп сенемін», – деді Президент.
