АСТАНА. 1 қыркүйек. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Еуразияда заманауи көлік-логистика жүйесін жедел қалыптастырып, Шанхай ынтымақтастық ұйымының (ШЫҰ) көлік байланысын дамыту стратегиясын әзірлеуді ұсынды.
«Қазақстан «Бір белдеу, бір жол» мегажобасын, Транскаспий халықаралық көлік бағытын, «Солтүстік – Оңтүстік» дәлізін, сондай-ақ Орталық және Оңтүстік Азия арасындағы келешегі зор сауда жолдарын өзара ұштастыруға ерекше мән береді. Қазақстан Шанхай ынтымақтастық ұйымының бүкіл аумағында көлік бастамаларын ілгерілетуге атсалысуға дайын», — деді Тоқаев сейсенбі күні Бішкекте өткен ШЫҰ-ға мүше мемлекеттер басшылары кеңесінің отырысында.
Мемлекет басшысы Қазақстан кеден рәсімдерін цифрландыруды, электронды құжаттарды өзара тануды, «жасыл дәліздер» қағидатын және басқа да заманауи тетіктерді енгізуді қолдайтынын атап өтті.
«Жүкті жөнелтілген жерінен соңғы алушыға дейін кедергісіз жеткізуді қамтамасыз ететін ШЫҰ-ның бірыңғай цифрлық транзит платформасын құру тиімді шешім болар еді. Шанхай ынтымақтастық ұйымының 2035 жылға дейінгі көлік байланысын дамыту стратегиясын әзірлеп, қабылдауды ұсынамыз», — деді Тоқаев.
