АСТАНА. 17 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев спорт федерацияларының мемлекет қаржысына толықтай сүйенуін сынға алды. Ол спортты дамыту азаматтық жауапкершілік болуы тиіс екенін айтып, оны жеке PR құралы ретінде пайдалануға болмайтынын ескертті.
«Қазіргі таңда спорт федерациялары бедел мен ықпал жинайтын құрылымдарға айналды. Көбінесе оларды ірі бизнес өкілдері мен мемлекеттік органдардың басшылары басқарып отыр. Алайда кәсіпкерлер спортты дамытуға өз қаржысын салудан гөрі, мемлекет қаржысына сүйенуге бейіл», – деді Тоқаев жұма күні құтқарушылар күніне арналған жиында.
Президент мемлекеттік қызметкерлердің де спорт саласындағы жоғары қоғамдық лауазымдарды өз беделін көтеру үшін пайдаланатынын атап өтті.
«Арасында спортшылардың жетістігін өз еңбегі ретінде көрсететіндер де бар. Бұл теріс үрдістерге тоқтау салатын уақыт келді. Қалыптасқан жағдайды жан-жақты саралау қажет, бұл тапсырманы Президент Әкімшілігіне жүктеймін», – деді ол.
Мемлекет басшысы спорт федерациясын жеке бедел көтеру құралы ретінде пайдалану – жол беруге болмайтын әрекет екенін қадап айтты.
«Мемлекет кәсіпкерлерді, оның ішінде ірі бизнес иелерін қолдайды. Бірақ мемлекет пен қоғам да олардың спортты, әсіресе футболды коммерцияландыру секілді бастамаларда кері байланыс білдіруін күтеді. Спорт және туризм министрлігі мен спорт федерациялары арасында тең құқылы диалог орнап, әр тараптың функциясы мен өкілеттігі нақты бөлінуі тиіс», – деді Тоқаев.
Сонымен қатар, Президент кейбір спорт федерацияларына жаңа буын бизнесмендер мен меценаттар келе бастағанын, оларға спортты дамыту бағытында нақты міндеттер жүктелгенін айтты.
