АСТАНА. 17 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаевтың айтуынша, құтқарушы мамандығы еліміздегі ең беделді кәсіптердің біріне айналуы тиіс.
«Төтенше жағдайлар қызметкерлері соңғы бес жыл ішінде шамамен 225 мың адамның өмірін сақтап қалды. Олар шет мемлекеттерде де гуманитарлық миссияларға қатысып, өздерінің жоғары кәсіби деңгейін тағы бір мәрте дәлелдеді. Осы арқылы еліміздің халықаралық беделінің артуына үлес қосты. Осыған байланысты бүгін барлық құтқарушыларымызға шынайы алғысымды білдіргім келеді», – деді Тоқаев кәсіби мерекелері қарсаңында құтқарушылармен кездесуде.
Президенттің айтуынша, азаматтық қорғау саласы қызметкерлері өз міндеттерін абыроймен атқарып, жанқиярлық танытуға әрдайым дайын.
«Өкінішке қарай, олардың арасында өз өмірін құрбан еткендер де аз емес. Соңғы 30 жыл ішінде 72 құтқарушы ерлікпен қаза тапты», – деді мемлекет басшысы.
Ол бес жыл бұрын Төтенше жағдайлар министрлігі қайта құрылғанын, саланың республикалық бюджеттен қаржыландыруы 2,5 есе артқанын атап өтті.
«Бірқатар нақты әрі тиімді шаралар қабылданды. Атап айтқанда, 1700-ден астам арнайы техника сатып алынды, 42 өрт сөндіру депосы мен құтқару станциясы салынды. Аудандық төтенше жағдайлар бөлімшелері заман талабына сай жаңғыртыла бастады», – деді Тоқаев.
Президенттің сөзінше, соңғы екі жыл ішінде ТЖМ қызметкерлерінің жалақысы 77%-ға өскен. Сондай-ақ оларға арнайы үстемеақы төленеді, тұрғын үй төлемдері мен әлеуметтік жеңілдіктер қарастырылған.
«Бұл бағыттағы жұмыс жалғасын табады. Осы шаралардың арқасында азаматтық қорғау саласының кадрлық әлеуеті нығаюда», – деді Тоқаев.
Сонымен қатар ол құтқарушы мамандығы Қазақстанда ең беделді кәсіптердің бірі болуы тиіс екенін айтты.
2025 жылғы 19 қазанда Қазақстанның Төтенше жағдайлар министрлігі өзінің 30 жылдық мерейтойын атап өтеді.
