АСТАНА. 17 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаевтың айтуынша, үкімет пен Төтенше жағдайлар министрлігі төтенше жағдайларды алдын алып, оларды тиімді жоюға ерекше назар аударуы қажет. Бұл мақсатта жасанды интеллект сияқты заманауи технологияларды пайдалану маңызды.
«Үкімет пен уәкілетті министрлік төтенше жағдайлардың алдын алу мен оларды жоюға ерекше мән беруі тиіс. Құтқару қызметтерінің орталықтағы және өңірлердегі іс-қимылдары – бұл біртұтас, нақты үйлестірілген тетік. Басқару процестерін автоматтандыруға және цифрландыруды, сондай-ақ жасанды интеллектті қоса алғанда, басқа да заманауи технологияларды кеңінен енгізуге басымдық беру қажет», – деді Тоқаев.
Оның айтуынша, «Заң және Тәртіп» идеологиясы аясында өнеркәсіптік нысандардағы қауіпсіздікті арттыруға бағытталған шаралар қабылданып жатыр, өртке қарсы талаптар мен құрылыс нормалары күшейтілген.
Мемлекет басшысы азаматтарға өрт, су тасқыны, жер сілкінісі кезіндегі қауіпсіздік ережелерін табандылықпен әрі түсінікті түрде жеткізуді тапсырды.
«Азаматтар апат кезінде қалай әрекет ету керектігін білуі тиіс, сондай-ақ бейбіт кезеңде, күнделікті өмірде қауіпсіздік шараларын сақтауы керек. Табиғат аясында демалу, ашық су қоймаларында шомылу, тауға шығу, ауа райы қолайсыз кезде көлік жүргізу және басқа да денсаулық пен өмірге қауіп төндіретін жағдайларда жауапты мінез-құлық қағидаларын қоғамда орнықтыру маңызды», – деп атап өтті Тоқаев.
