Астана. 7 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ақ үйдегі келіссөздер барысында АҚШ Президенті Дональд Трамппен екіжақты стратегиялық әріптестікті кеңейту перспективаларын талқылады, деп хабарлады Мемлекет басшысының баспасөз қызметі.
Хабарламада атап өтілгендей, сапар аясында Қазақстан мен АҚШ компаниялары арасында $17 млрд-тан астам көлемде коммерциялық келісімдерге қол қойылды.
«Тоқаев Трамптың президенттік қызметінің тарихи маңызын атап өтіп, оның басшылығымен Америка Құрама Штаттары әлемнің жетекші экономикалық, саяси және технологиялық державасы ретінде өз позициясын нығайтып отырғанын айтты. Президенттің айтуынша, АҚШ басшысы әлемде қауіпсіз, тұрақты және өркендеген орта қалыптастыруға шешуші үлес қосып келеді», – делінген хабарламада.
Сондай-ақ, Мемлекет басшысы Қазақстанның АҚШ Президентінің бейбітшілікке бағытталған бастамаларын, соның ішінде «Халықаралық бейбітшілік пен өркендеу жолы» (TRIPP) жоспарын қолдайтынын жеткізді. Аталған бастама Орта дәліздің әрі қарай дамуына ықпал ете алады.
Өз кезегінде Дональд Трамп АҚШ-тың Қазақстанмен көпқырлы кеңейтілген стратегиялық әріптестікті одан әрі нығайтуға бейілді екенін растады.
Тараптар екіжақты күн тәртібіндегі кең ауқымды мәселелер бойынша пікір алмасты, өзара тиімді ынтымақтастықтың басым бағыттарын айқындады және халықаралық күн тәртібінің өзекті мәселелерін талқылады.
