Астана. 24 сәуір. «Интерфакс-Қазақстан» — Қазақстан Ұлттық Банкі алдағы шешімдер аясында макроэкономикалық ахуал сақталып, сыртқы күйзелістер туындамаған жағдайда базалық мөлшерлемені төмендету мүмкіндігін қарастыруға дайын екенін мәлімдеді.
«Қалыптасқан үрдістер сақталып, жаңа сыртқы күйзелістер болмаса, Ұлттық банк келесі шешімдер барысында базалық мөлшерлемені төмендету мүмкіндігін қарастыруға дайын болады», — делінген жұма күні таратылған хабарламада.
Реттеуші инфляцияның баяулау қарқынын, ішкі сұраныс динамикасын, фискалдық шоғырландырудың нақты орындалуын, квазифискалдық ынталандыру параметрлерін және реттелетін бағаларды, сондай-ақ сыртқы экономикалық жағдайды және оның инфляцияға ықпалын бағалауды жалғастыратынын атап өтті.
Жұма күні Ұлттық банк базалық мөлшерлемені күткендей 18% деңгейінде сақтады. Бұл деңгей 2025 жылғы қазан айынан бері өзгеріссіз қалып отыр.
