Париж. 18 ақпан. ИНТЕРФАКС — Вашингтонның Дания құрамындағы өзін-өзі басқаратын аумақ — Гренландияға қатысты негізгі мүддесі сирек жер металдарына емес, АҚШ-тың ұлттық қауіпсіздігін қамтамасыз етуге байланысты. Бұл туралы АҚШ Энергетика министрі Крис Райт мәлімдеді.
«Бізде сирек жер металдарын, мұнай мен газды өндіруге болатын орындар жеткілікті. Мұндай жобалар гренландиялықтардың тұрмыс сапасын жақсартуы мүмкін, ал біздің басты мүддеміз — ұлттық қауіпсіздік», — деп келтіреді Bloomberg оның сөзін.
Министрдің түсіндіруінше, табиғи ресурстарды игеру АҚШ-тың Гренландияға қатысты қосымша мақсаттарының бірі ретінде қарастырылуы мүмкін және ол жергілікті халық үшін экономикалық мүмкіндіктерді кеңейтуге ықпал етуі ықтимал.
«“Сирек жер металдары” деген атау шартты ғана, өйткені олар кеңінен таралған және шын мәнінде сирек емес. Бұл металдарды өндіру үшін әлдеқайда қолайлы өңірлер де бар», — деп түйіндеді Райт.
Бұған дейін АҚШ президенті Дональд Трамп Дания құрамына кіретін Гренландияның АҚШ құрамына қосылуын жақтаған болатын. Бұл бастама Дания мен Гренландия билігінің қарсылығын туғызды. Кейін Трамп НАТО-ның бас хатшысы Марк Рюттенің ымыралы нұсқаны талқылау жөніндегі ұсынысын қабылдады.
Гренландия Арктикадағы қауіпсіздік жүйесінде стратегиялық маңызды буын, теңіз бағыттарының бастапқы нүктесі, сондай-ақ сирек жер металдары мен өзге де табиғи ресурстарға бай аумақ ретінде қарастырылады. Батыс БАҚ деректеріне сәйкес, аралда графит, мыс, мырыш, алтын, алмас, темір кені, титан, ванадий және уран қорлары бар, алайда геологиялық барлау жұмыстары толық көлемде жүргізілмеген. Қазіргі уақытта Гренландия аумағында АҚШ-тың «Питуффик» ғарыш базасы орналасқан.
