Гонконг. 25 тамыз. ИНТЕРФАКС-КАЗАХСТАН – Вьетнам үкіметі күшейіп келе жатқан «Кадзики» тайфунына байланысты 325 мыңнан астам тұрғынды қауіпсіз аймаққа көшіруге шешім қабылдады. Бұл туралы дүйсенбі күні Channel News Asia телеарнасы хабарлады.
Билік өкілдері бес жағалау провинциясындағы тұрғындарды эвакуациялап жатыр. Аталған өңірлердегі мектептер мен қоғамдық ғимараттар уақытша баспана ретінде жабдықталған.
Вьетнамның Азаматтық авиация басқармасының мәліметінше, Тханьхоа және Куангбинь провинцияларындағы екі әуежай уақытша жабылды. Vietnam Airlines және Vietjet әуе компаниялары осы өңірге және өңірден ұшатын ондаған рейсті тоқтатты.
Метеорологтардың дерегі бойынша, желдің жылдамдығы сағатына 166 шақырымға дейін жеткен «Кадзики» тайфуны елдің орталық жағалауына қарай бет алып келеді. Болжам бойынша, дүлей дауыл дүйсенбі күні күндіз материкке жетуі мүмкін.
Тайфун жолындағы барлық балық аулау кемелері порттарға қайтарылды.
Вьетнам үкіметі «Кадзики» тайфуны 2023 жылдың қыркүйегінде елге ауыр шығын әкелген «Яги» тайфунымен салыстырмалы күшке ие болуы мүмкін екенін атап өтті. Сол кезде шамамен 300 адам қаза тауып, 3,3 миллиард АҚШ долларына жуық материалдық шығын келген болатын.
Болжам бойынша, дауылдың негізгі соққысы елдің солтүстігіндегі Тханьхоа мен Нгеан провинциялары аралығында болады.
Channel News Asia телеарнасының дерегінше, «Кадзики» – биыл Вьетнамға жеткен бесінші тайфун.
