АСТАНА. 5 қаңтар. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаевтың айтуынша, 2022 жылғы Қаңтар оқиғасы бойынша сот процесі әлі де жалғасып жатыр, ал күштік құрылымдар сол күндері ұрланған қаруларды іздестіруді жалғастыруда.
«Бірқатар сот істері әлі аяқталған жоқ, сондай-ақ Қаңтар күндері ұрланған қаруларды іздеу жұмыстары да жүріп жатыр. Сол кезде қылмыскерлердің қолына үш мыңнан астам қаруы түскен еді. Алайда күштік құрылымдарының арқасында қару сақталған орындардың басым бөлігі анықталды», – деді Мемлекет басшысы дүйсенбі күні «Turkistan» газетінде жарияланған сұхбатында.
Президенттің айтуынша, жаппай тәртіпсіздіктер алдын ала жоспарланған және олар Қазақстанның 12 қаласын қамтыған, әкімдіктер мен құқық қорғау органдарының ғимараттары басып алынған.
«Бүлік ұйымдастырушылары, “революциялық технологиялар” бойынша мамандардың бағыттауымен, үкіметтің жанармай бағасын көтеру туралы шешімін пайдаланып, халықты жаппай митингілерге шығуға итермеледі. Кейін қоғамда, мемлекеттік қызметкерлер арасында, тіпті таңғаларлығы – күштік құрылымдардың елеулі бөлігінде де үрей туындады. Олар қызмет орнын тастап, құпия құжаттарды, қару-жарақты қалдырып кетті. ҰҚК мен ІІМ-нің бірқатар басшылары Отанға адалдық пен кәсібилік сынағынан өте алмады», – деді Тоқаев.
2022 жылғы қаңтарда Батыс Қазақстандағы Жаңаөзен қаласында басталған бейбіт митингілер бүкіл елге таралып, әлеуметтік-экономикалық және саяси талаптармен жалпыхалықтық наразылыққа ұласты. Бірқатар өңірлерде әкімшілік ғимараттарға, полиция бөлімшелеріне және сауда нысандарына шабуыл жасалды. Құқық қорғау органдары мен қару дүкендерінен шамамен үш мың дана қару және ондаған мың оқ-дәрі ұрланды. Тәртіпсіздіктер салдарынан 238 адам қаза тапты.
