Астана. 9 қаңтар. ИНТЕРФАКС-ҚАЗАҚСТАН – Астанада Қазақстан Республикасының Президенті Қасым-Жомарт Тоқаевтың атына Америка Құрама Штаттарының елшісі Джули Стаффт пен Болгария Республикасының елшісі Георги Воденски сенім грамоталарын табыстау рәсімі өтті. Бұл туралы Мемлекет басшысының баспасөз қызметі хабарлады.
Болгария елшісіне сөз арнаған Президент Қасым-Жомарт Тоқаев Болгария Президенті Румен Радевке сәлем жолдап, оның өткен жылы Қазақстанға жасаған ресми сапары екіжақты қарым-қатынастарды дамытуға елеулі серпін бергенін атап өтті.
«Біз Сіздің тамаша еліңізбен ынтымақтастықты одан әрі дамытуға мүдделіміз. Саяси салада да, экономика бағытында да өзара іс-қимыл аясын кеңейту үшін барлық қажетті шараларды қабылдайтын боламыз», – деді Мемлекет басшысы.
Қазақстан–АҚШ қатынастарына тоқталған Президент өткен жылғы қараша айында АҚШ-қа жасаған ресми сапарының маңыздылығын еске салды.
«Президент Дональд Трамппен достық әрі мазмұнды кездесу өтті. Жуырда екіжақты ынтымақтастыққа қатысты көптеген мәселелер бойынша нәтижелі телефон арқылы сөйлестік. Осы жылдың соңында Америка Құрама Штаттарында өтетін G20 саммитіне қатысуға шақырғаны үшін ризашылығымды білдіремін. Біз стратегиялық әріптестікті түрлі бағыттарда сақтау және нығайту үшін бар күш-жігерімізді саламыз», – деді Қасым-Жомарт Тоқаев.
Мемлекет басшысы елшілерді дипломатиялық миссияларының ресми басталуымен құттықтап, олардың елдерінің басшыларына ізгі тілегін жеткізді.
