Астана. 15 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ресей, славян және казак ұйымдары қауымдастығының төрағасы, Мәжіліс депутаты Сергей Пономаревтің қазақстандық жалпыұлттық бірегейлікті және халық бірлігін одан әрі нығайту бағытында атқарылып жатқан жұмыстар туралы есебін тыңдады. Бұл туралы Мемлекет басшысының баспасөз қызметі хабарлады.
Таратылған ақпаратқа сәйкес, Пономарев славян ұйымдарының мемлекеттік тілді қоғамды ұйыстырушы фактор ретінде ілгерілету жөніндегі жұмысы, сондай-ақ Қауымдастықтың 2026 жылға арналған жоспарлары туралы баяндады. Аталған жоспарлар Қазақстан халқы Ассамблеясын дамытудың 2030 жылға дейінгі «Әралуандықтағы бірлік» тұжырымдамасын іске асыруды көздейді.
Баспасөз қызметінің мәліметінше, Мемлекет басшысы этносаралық келісім мен халық бірлігі мемлекеттік саясаттың аса маңызды бағыттарының бірі екенін атап өтті. Президенттің айтуынша, әділдік пен барлық азаматтар үшін тең мүмкіндіктерді қамтамасыз ету – Әділетті Қазақстанның негізгі қағидаты.
Осы тұрғыда Қазақстан халқы Ассамблеясының және оның құрамына кіретін ұйымдардың қызметі бұрынғыдай барлық этнос өкілдері арасында қазақстандық патриотизмге негізделген ұйыстырушы құндылықтарды ілгерілетуге бағытталатын болады.
Қазақстан халқы Ассамблеясы консультативтік-кеңесші орган болып табылады және республикада тұратын барлық ұлттар мен ұлыстардың өкілдерін біріктіреді. Ассамблеяны құру идеясы 1992 жылы елдің Тұңғыш Президенті Нұрсұлтан Назарбаевтың бастамасымен ұсынылған, ол шамамен 30 жыл бойы осы ұйымға төрағалық етті. 2021 жылғы сәуірде Назарбаев Ассамблея төрағасының өкілеттігін Президент Қасым-Жомарт Тоқаевқа тапсырды.
Қазақстан халқы Ассамблеясының сессияларында елдің дамуына қатысты маңызды ұсыныстар мен бастамалар көтеріліп, олар кейіннен Мемлекет басшысының заңдары мен жарлықтары арқылы іске асырылады.
