Астана. 15 қаңтар. ИНТЕРФАКС-ҚАЗАҚСТАН – Қазақстанда 2025 жылы тұтынушылық кредиттеу 2024 жылмен салыстырғанда екі есеге баяулады. Бұл туралы Мемлекет басшысына Қаржы нарығын реттеу және дамыту агенттігінің (ҚНРДА) төрағасы Мадина Әбілқасымова баяндады.
Президенттің баспасөз қызметі бейсенбі күні таратқан хабарламада: «Тұтынушылық кредиттеу 2024 жылмен салыстырғанда екі есе баяулады. Мерзімі өткен берешегі бар жағдайда 5 жылдан асатын мерзімге қарыз беруге тыйым салынды, 3 жылдан 5 жылға дейінгі мерзімге берілетін және тәуекелі жоғары қарыздарды ұсыну шектелді, сондай-ақ қарыз алушының жиынтық қарызының табысқа қатынасының жаңа коэффициенті енгізілді», – делінген.
Әбілқасымованың айтуынша, халықтың шамадан тыс қарыздануын азайту мақсатында банктер мен микроқаржы ұйымдары 703 мың қарыз алушының несиелерін реттеп, ішінара кешірген. Жеке тұлғалардың банкроттығы туралы заңның қолданылу кезеңінде банктер 56 мың азаматтың 209,7 млрд теңге көлеміндегі берешегін кешірген.
2025 жылдың қарашадағы жағдай бойынша бизнеске берілген кредиттер 17,9%-ға өсіп, 14,8 трлн теңгеге жетті. Кәсіпкерлік субъектілеріне жаңа кредиттер ретінде 17,5 трлн теңге бөлінді. Банктер жалпы құны 2,3 трлн теңгені құрайтын сегіз синдикатталған жобаны бірлесіп қаржыландырып отыр.
Сонымен қатар шағын және орта бизнесті қолдау мақсатында 2025 жылы маусымда «Даму» қорының базасында шағын және орта бизнес кредиттеріне арналған Кепілдік қоры құрылды. Осы тетік аясында 505 млрд теңге сомасына кредиттер бойынша кепілдіктер берілді.
Кездесу қорытындысы бойынша Мемлекет басшысы қаржылық тұрақтылықты қамтамасыз етуге, экономиканың нақты секторын кредиттеуді ұлғайтуға және қаржылық қызметтерді тұтынушылардың құқықтарын қорғауды күшейтуге бағытталған бірқатар тапсырма жүктеді.
Бұған дейін жарияланған ҚНРДА деректеріне сәйкес, 2025 жылдың 11 айында халыққа берілген жаңа қарыздардың өсім қарқыны бәсеңдеген. Аталған кезеңде бұл көрсеткіш 17,8 трлн теңгені құрап, 2024 жылдың осы кезеңімен салыстырғанда 9,6%-ға артқан. Ал 2024 жылдың қаңтар–қараша айларында халыққа 16,2 трлн теңге көлемінде жаңа кредит берілген, бұл 2023 жылдың сәйкес кезеңімен салыстырғанда 22,1%-ға көп.
15 қаңтарға арналған ресми айырбас бағамы – 510,43 теңге / 1 АҚШ доллары.
