Мәскеу. 9 наурыз. ИНТЕРФАКС – G7 елдерінің қаржы министрлері стратегиялық мұнай қорларынан бірлесіп мұнай шығару мүмкіндігін талқылайды. Бұл процесс Халықаралық энергетикалық агенттік (ХЭА) арқылы үйлестірілуі мүмкін. Бұл туралы Financial Times басылымы хабарлады.
Дүйсенбі күні мұнай бағасы Таяу Шығыстағы әскери іс-қимылдар аясында күрт өсіп, 2022 жылдан бергі ең жоғары деңгейге жетті. Бір баррель мұнайдың бағасы 119 доллардан асты.
Financial Times дереккөздерінің мәліметінше, G7 елдерінің қаржы министрлері мен ХЭА басшысы Фатих Бироль қалыптасқан жағдайды талқылау үшін дүйсенбі күні шұғыл кеңес өткізбек.
Дереккөздердің айтуынша, G7 құрамындағы үш мемлекет, оның ішінде АҚШ, стратегиялық қорлардан мұнай шығару идеясын қолдайтынын білдірген.
Қазіргі уақытта ХЭА-ға мүше 32 мемлекет төтенше жағдайларға арналған бірлескен жүйе аясында стратегиялық мұнай қорларын ұстап отыр. Бұл жүйе мұнай нарығындағы дағдарыстарға қарсы әрекет ету мақсатында құрылған. Агенттікке мүше елдердің стратегиялық қорларында жалпы көлемі 1,2 млрд баррельден астам мұнай бар.
Дереккөздердің бірінің айтуынша, АҚШ-тағы бірқатар шенеунік стратегиялық қорлардың шамамен 25–30%-ына тең, яғни 300–400 млн баррель мұнайды нарыққа шығару орынды деп есептейді.
