ҚР Бас прокуратурасы хабарлайды: «Абай облысының прокуратурасы облыс әкімдігімен бірлесіп, «Адал адам – Адал еңбек» жобасын іске асыруды бастады. Жұмыс берушілер мен жұмысқа орналасуға ниет білдірген тұлғалар үшін диалог алаңы ұйымдастырылды. Шараға Семей қаласының тұрғындары қатысты. Қатысушылар іс-шара форматын оң қабылдап, ұсынылған жұмысқа орналасу мүмкіндіктеріне қызығушылық танытты. Аталған алаң халықты жұмыспен қамтуға жәрдемдесудің тиімді құралына айналды. Бір күннің ішінде 50-ден астам жұмыссыз азамат облыс орталығындағы ірі кәсіпорындарға жұмысқа орналасу үшін жолдама алды. Олардың ішінде 10 азамат халықтың әлеуметтік осал топтарынан болса, 21 азамат пробация қызметінің есебінде тұрғандар, сондай-ақ 4 адам алименттік міндеттемелер бойынша борышкерлер қатарынан. Бастама халықтың жұмыспен қамтылу деңгейін арттыруға, әлеуметтік шиеленісті азайтуға және заңдылық пен құқықтық тәртіп қағидаттарын нығайтуға бағытталған».
Еуразия24 пікірі:
Өңірлерде прокурорлар жұмыссыздарды жұмысқа орналастыру ісімен айналыса бастады. Заңның сақталуын қадағалайтын сақшылар өздеріне тән емес салаға араласып кеткендей әсер қалдырады. Прокуратураның жалақы бойынша қарыздарды өндіру сияқты еңбек дауларына араласуы жұмысшылардың құқығын қалпына келтірудің жалғыз пәрменді құралы екенін жоққа шығармаймыз, бірақ олардың рекрутерге айналуы — ақылға сыймайтын дүние. Мүмкін, прокурорларды мұндай тосын міндеттерді орындауға белгілі бір жағдайлар мәжбүр еткен болар. Мәселен, әкімдіктердің халықты жұмыспен қамтудағы дәрменсіздігі немесе тиімсізділігі себеп болуы мүмкін. Ал жанында погон таққан тұлғалардың жүруі азаматтық шенеуніктерді тәртіпке салып, көріп отырғанымыздай, бірден оң нәтиже береді. Дегенмен, жұмыссыздықты азайту мәселесінде прокуратураны «сойыл» ретінде пайдалану кері әсерін тигізбеуі үшін аса сақтықты қажет етеді. Мұндай тәжірибенің науқаншылдыққа айналып кету қаупі бар — жұмысқа орналастыру көрсеткіштері ведомствоның беделі арқылы көтерілгенімен, бұл жұмыс орындарының тұрақтылығына ешкім кепілдік бере алмайды. Әсіресе, есепте тұрған тұлғалар мен алимент бойынша борышкерлерді жұмысқа орналастыруға басымдық берілуі назар аудартады. Мұндағы прокурорлардың ұстанымы түсінікті — құқық бұзушылықтың алдын алу және төлемдердің өтелуін қамтамасыз ету. Бірақ, егер «Адал адам – Адал еңбек» жобасы жұмыс берушілерді күштік құрылымдардың қатаң бақылауымен «күмәнді» қызметкерлерді қабылдауға мәжбүрлейтін тетікке айналса, онда өңірлердегі жұмыспен қамтуды үйлестіру және әлеуметтік бағдарламалар басқармаларының қажеті қанша?
