Мәскеу. 16 маусым. ИНТЕРФАКС – АҚШ пен Иран арасындағы бейбіт келісім туралы жаңалықтар аясында қор нарықтарының өсуі нәтижесінде дүйсенбі күні әлемдегі ең бай 500 адамның жиынтық байлығы 336 млрд АҚШ долларына көбейді.
Bloomberg агенттігінің есебінше, бұл – бақылау тарихындағы бір күндік ең ірі өсім.
Қазіргі таңда әлемдегі ең бай 500 адамның иелігіндегі активтердің жалпы құны 13,3 трлн долларға жетті.
Рейтингтегі көшбасшылық орнын Илон Маск одан әрі нығайтты. Оның SpaceX аэроғарыштық компаниясы акцияларының шамамен 20 пайызға қымбаттауы нәтижесінде кәсіпкердің байлығы 1,27 трлн долларға жеткен. Бір күн ішінде Масктың дәулеті 164 млрд долларға артты. Бұл көрсеткіш рейтингтегі қалған 499 адамның активтері құнының жиынтық өсімімен шамалас.
Тізімде екінші орында тұрған Ларри Пейдждің активтері 314 млрд долларға, Сергей Бриннің байлығы 292 млрд долларға, Джефф Безостың активтері 267 млрд долларға, ал Ларри Эллисонның дәулеті 247 млрд долларға бағаланып отыр.
Дүйсенбі күнгі сауда қорытындысы бойынша SpaceX компаниясының нарықтық капитализациясы 2,5 трлн долларға жетті. Ал сейсенбі күнгі алдын ала сауда сессиясында компания акциялары тағы 10 пайызға өсіп жатыр.
Bloomberg мәліметінше, рейтингтің соңғы орындарын бөлісіп тұрған шамамен он шақты миллиардердің әрқайсысының байлығы 7,9 млрд долларды құрайды. Бұл – аталған элиталық тізімге ену үшін қажет ең жоғары тарихи шек.
Бұған дейін АҚШ президенті Дональд Трамп пен Иран парламентінің төрағасы Мұхаммед-Бакир Ғалибаф дағдарысты реттеу үдерісін бастау жөніндегі меморандумға электронды форматта қол қойғаны белгілі болған еді. Құжатқа ресми қол қою рәсімі жұма күні Швейцарияда өтеді деп жоспарланған.
Меморандум әскери іс-қимылдарды тоқтатуға және Ормуз бұғазы арқылы кеме қатынасын қайта қалпына келтіруге бағытталған.
Осы жаңалықтардың әсерінен америкалық Dow Jones Industrial Average қор индексі 0,9 пайызға өсіп, тарихи ең жоғары деңгейін жаңартты.
