Астана. 18 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев денсаулық сақтау жүйесінің материалдық-техникалық базасын жаңартуды тапсырды.
«Ауылдық денсаулық сақтауды жаңғырту жөніндегі ұлттық жобаның алғашқы кезеңі табысты іске асырылды. 2023 жылдан бері алғашқы медициналық-санитарлық көмек көрсететін 655 жаңа нысан салынды. Биыл 32 аудандық аурухананы жаңғырту жұмыстары аяқталады, бұл азаматтарды тұрғылықты жеріне жақын жерде сапалы медициналық көмекпен қамтамасыз етуге мүмкіндік береді», – деді Тоқаев бейсенбі күні Медицина қызметкерлері күніне арналған салтанатты іс-шарада сөйлеген сөзінде.
Сонымен қатар, Мемлекет басшысы алда ауқымды жұмыстар күтіп тұрғанын атап өтті.
«Елімізде пайдалану мерзімі өтіп кеткен 14 мыңнан астам нысан әлі де жұмыс істеп тұр. Сондықтан Үкіметке денсаулық сақтау саласының бүкіл инфрақұрылымын ауқымды түрде жаңғыртып, оның материалдық-техникалық базасын жаңарту міндеті жүктеледі», – деді президент.
