Астана. 18 маусым. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күнгі пленарлық отырыста «Экология мәселелері және экономиканың жекелеген салаларын жетілдіру бойынша кейбір заңнамалық актілерге өзгерістер мен толықтырулар енгізу туралы» заңды бірінші оқылымда мақұлдады.
«Заң жобасында экологиялық ақпаратты жинақтайтын Бірыңғай ұлттық экологиялық деректер банкін қалыптастыру көзделген. Оның құрамына мониторинг жүйелерінің деректері мен өндірістік экологиялық бақылау нәтижелері енгізіледі. Бұл ақпараттың ашықтығын қамтамасыз етіп, бақылау тиімділігін арттыруға мүмкіндік береді», – деді отырыста сенатор Сұлтан Дүйсембинов.
Оның айтуынша, заң жобасында орман және жайылымдық көміртек офсеттері институтын құру қарастырылған. Бұл орман өсіру жобаларын іске асыруға және елдің климаттық міндеттемелерін орындауға жеке инвестицияларды тартуға мүмкіндік береді.
Сонымен қатар қалдықтарды басқару жүйесін жетілдіру көзделіп отыр.
«Рұқсат етілмеген қоқыс орындарын жою жөніндегі өкілеттіктер жергілікті атқарушы органдарға беріледі. Сондай-ақ қатты тұрмыстық қалдықтарды жинау, тасымалдау, сұрыптау және көму саласындағы тарифтік саясатты өңірлік ерекшеліктерді ескере отырып жүзеге асыру қарастырылған», – деді депутат.
Құжатта ұлттық гидрометеорологиялық қызметтің жұмысын жетілдіру де көзделген. Қазгидромет РМК-ның мемлекеттік функциялары мен бәсекелестік негізде көрсетілетін қызметтері нақты ажыратылатын болады. Бұл бюджет қаражатын тиімдірек пайдалануға және көрсетілетін қызметтердің сапасын арттыруға мүмкіндік береді.
Заң жобасында нормадан тыс шығарындылар үшін жауапкершілік айқындалып, нормадан тыс эмиссияларды есептеу тәртібі нақтыланады.
Бұдан бөлек, қайта өңделген шикізатты пайдаланатын отандық өндірушілерді ынталандыру шаралары енгізіледі. Бұл қайта өңдеу өнеркәсібін дамытуға және тұйық циклді экономиканы қалыптастыруға ықпал етеді.
Жалпы, заң мемлекеттік экологиялық саясаттың тиімділігін арттыруға, табиғи ресурстарды ұтымды пайдалануға және мемлекет, бизнес пен қоғам арасындағы жауапты әріптестікті нығайтуға бағытталған.
