Астана. 30 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев биыл тамызда өтетін бір палаталы парламент – құрылтай сайлауы ашық, адал және әділ бәсеке жағдайында өтуі тиіс екенін мәлімдеді.
«Жаңа Конституцияның заңды күшіне енуі – тарихи оқиға. Қабылданған Негізгі заң қоғамдық-саяси жаңғырудың ауқымды кезеңіне жол ашады. Осыған байланысты мен құрылтай сайлауын өткізу туралы арнайы жарлықты қоса алғанда, бірқатар маңызды құжаттарға қол қоямын», – деді Тоқаев сейсенбі күні парламент палаталарының бірлескен отырысында.
Президенттің айтуынша, осының нәтижесінде партияаралық бәсеке жаңа серпін алады.
«Біз жасампаз мемлекет ретінде бұл саяси науқанды жоғары деңгейде өткізуге міндеттіміз. Алдағы сайлау ашық, адал әрі әділ бәсеке жағдайында өтуі керек», – деп қосты Мемлекет басшысы.
Қазақстанда 1 шілдеден бастап республикалық референдумда қабылданған жаңа Конституция күшіне енеді. Осыған байланысты 1995 жылғы 30 тамызда қабылданған бұрынғы Негізгі заңның күші жойылып, мәжіліс пен сенаттан тұратын екі палаталы парламенттің өкілеттігі тоқтатылады.
2026 жылғы 15 наурыздағы референдумда қабылданған Конституциядағы басты жаңалықтардың бірі – екі палаталы парламенттің орнына 145 депутаттан тұратын бір палаталы құрылтайдың құрылуы. Оның депутаттары тек партиялық тізім бойынша сайланады.
Конституцияға сәйкес, Президент құрылтай сайлауын жаңа Конституция күшіне енген күннен бастап бір ай ішінде жариялап, екі ай ішінде өткізуі тиіс.
Өкілеттігі 1 шілдеде тоқтайтын екі палаталы парламент Қазақстанда 1996 жылдан бері жұмыс істеді. Оның құрамында 148 депутат болды: 98 мәжіліс депутаты және 50 сенатор.
