Павлодарда 29 маусымға қараған түні оқиғаға толы болды. Әрине, бұл түннің «қызығын» бәрі бірдей көрген жоқ. Мас күйде жергілікті тұрғын дүкен тонап, полиция көлігін айдап кетіп, тәртіп сақшыларынан қашпақ болған. Kursiv басылымының жазуынша, «Павлодар тұрғыны GTA 6-ның шығуын күтпеген сияқты. (…) БАҚ мәліметінше, түнде мас күйдегі ер адам «Счастье» дүкенін тонаған. Полиция оны ұстағанымен, ол қашып шығып, қызметтік көлікті айдап кеткен. Артынша қала көшелерінде бірнеше полиция экипажы оның ізіне түскен. Ақыры Назарбаев және Казахстанская правда көшелерінің қиылысында жол-көлік оқиғасына ұшырады. Соған қарамастан ешкім зардап шеккен жоқ. Ер адамға ұрлық және полиция көлігін заңсыз иемдену фактілері бойынша қылмыстық іс қозғалды», – деп жазады Kursiv.
Психологтар мен криминологтар қылмыстың едәуір бөлігі алкоголь немесе есірткі ықпалымен жасалатынын әлдеқашан айтып келеді. Мұндай адамдардың көпшілігі ішімдік не есірткі қолданбағанда заңға қайшы әрекетке бармас еді.
Бас прокуратураның Құқықтық статистика және арнайы есепке алу жөніндегі комитетінің мәліметтері бойынша, 2025 жылы кісі өлтірудің 388 дерегі тіркелген, оның 214-і мас күйде жасалған, яғни шамамен әрбір екінші қылмыс. Сондай-ақ зорлаудың 393 дерегі тіркеліп, оның 90-ы алкогольдік мас күйде жүзеге асырылған, бұл шамамен әрбір төртінші жағдайға сәйкес келеді. Бұдан бөлек, «бұзақылық» бабы бойынша 1466 қылмыс тіркелсе, оның 474-і алкогольдік мас күйде жасалған, бұл — әрбір үшінші қылмыс. Бұл статистикалық мәліметтерді Factcheck.kz басылымы алға тартады.
Сірә, масы тарқап, есін жиған соң павлодарлық тұрғын өз әрекетіне өкінген болар. Бірақ енді оған келтірілген шығынды өтеп қана қоймай, қылмыстық жауапкершілікке де тартылуға тура келеді. Оның үстіне, мас күйде жасалған қылмыс сот үкімі шығарылған кезде жауаптылықты ауырлататын мән-жай ретінде ескеріледі.
