Мадрид. 30 маусым. ИНТЕРФАКС – Перудің консервативті «Халық күші» партиясының жетекшісі Кейко Фухимори президент сайлауының екінші турында жеңіске жетті. Бұл туралы дауыс берудің түпкілікті қорытындылары көрсетіп отыр.
Перудің Ұлттық сайлау процестерін басқару басқармасының мәліметінше, 7 маусымда өткен екінші турда Фухимори сайлаушылардың 50,135%-ының дауысын жинаған. Ал солшыл «Перу үшін бірге» партиясының кандидаты Роберто Санчес 49,865% дауысқа ие болды.
«Дауыс беру бюллетеньдерінің 100%-ы өңделді. Біз Перу халқы үшін тәртіп пен үмітке бастайтын жаңа жолға қадам басып келеміз», – деп жазды Фухимори X әлеуметтік желісінде.
Перудің Ұлттық сайлау алқасы Фухиморидің жеңісін ресми түрде 3 шілдеде жариялайды.
Кейко Фухимори 51 жаста. Ол Перудің бұрынғы президенті Альберто Фухиморидің қызы.
Фухиморидің ұлықтау рәсімі 28 шілдеде өтеді. Ол Перу тарихындағы алғашқы әйел президент болады. Ел президенті бес жыл мерзімге сайланады.
Бұған дейін Роберто Санчес Фухимори үкіметін мойындамайтынын мәлімдеп, шетелде өткен дауыс берудің нәтижелерін жарамсыз деп тануды талап еткен еді. Оның пікірінше, шетелдегі сайлау заңбұзушылықтармен өткен. Егер бұл талап қанағаттандырылғанда, Санчес Фухимориден басым түсер еді. Алайда оның бұл уәждері дәлелсіз деп танылды.
