Астана. 7 шілде. ИНТЕРФАКС-ҚАЗАҚСТАН – Президент Қасым-Жомарт Тоқаев мемлекеттік аудит жүйесін жетілдіруді, оның ішінде заманауи цифрлық шешімдер мен жасанды интеллект технологияларын кеңінен енгізуді тапсырды. Бұл туралы Мемлекет басшысының Жоғары аудиторлық палатаның төрағасы Әлихан Смайыловпен кездесуінің қорытындысы бойынша Ақорданың баспасөз қызметі хабарлады.
Кездесу барысында Президент Жоғары аудиторлық палатаның 2026 жылдың бірінші жартыжылдығындағы қызметінің қорытындылары туралы есепті тыңдады.
Әлихан Смайылов есепті кезеңде жалпы көлемі 5,8 трлн теңгені қамтыған 13 ірі мемлекеттік аудит жүргізілгенін айтты. Тексерулер жекелеген өңірлердің жергілікті атқарушы органдарын, «Проблемалық кредиттер қоры» АҚ-ны, «Аграрлық несие корпорациясы» АҚ-ны, «Қазпошта» АҚ-ны, «Ақтау халықаралық теңіз сауда порты» АҚ-ны, денсаулық сақтау инфрақұрылымын және бірқатар мемлекеттік органдарды қамтыды.
«Анықталған заң бұзушылықтарды жою нәтижесінде мемлекеттік бюджетке 128 млрд теңге қайтарылды», – делінген хабарламада.
Аудит қорытындысы бойынша Үкіметке және тексерілген ұйымдарға 35 ұсыным мен 413 нұсқама жолданған.
Сонымен қатар Жоғары аудиторлық палатаның бірқатар бастамалары ұлттық заңнамаға енгізілді. Атап айтқанда, макроэкономикалық болжамды қалыптастырудың жаңа қағидалары қабылданды, мемлекеттік қаражаттың жұмсалуына қазынашылық бақылау күшейтілді және төртінші тоқсанда бюджетті нақтылауға тыйым салынды.
Смайылов жекешелендіру рәсімдерінің ашықтығы мен тиімділігін арттыру, сондай-ақ агроөнеркәсіп кешенін мемлекеттік реттеу тетіктерін жетілдіру бағытында атқарылып жатқан жұмыстар туралы да баяндады.
Оның айтуынша, 2026 жылдың екінші жартыжылдығында тағы 20 мемлекеттік аудит аяқталады. Оның төртеуі Президенттің тікелей тапсырмасымен жүргізіледі. Олар Шымкент қаласы, Қарағанды және Шығыс Қазақстан облыстарының қызметіне, сондай-ақ фармацевтикалық өнім өндірушілерді қолдау тетіктеріне қатысты болады.
Сондай-ақ газ саласы, инвестициялық қызмет, «Жасыл Даму» АҚ мен «ҚазАвтоЖол» ҰК» АҚ-ның жұмысы, жекелеген ұлттық жобалар, «Ауыл – ел бесігі» жобасы және басқа да бағыттар бойынша аудит жүргізіледі.
Жаңа Құрылтаймен өзара іс-қимыл аясында 2027–2029 жылдарға арналған республикалық бюджет жобасына да бағалау жүргізіледі.
7 шілдедегі ресми бағам – 1 АҚШ доллары үшін 472,03 теңге.
