Астана. 21 шілде. ИНТЕРФАКС-ҚАЗАҚСТАН – Astana Motors компаниясы 2026 жылдың қараша айынан бастап Astana брендімен дизельді және газбен жүретін автобустардың өндірісін бастайды. Ал 2027 жылдан бастап қытайлық BYD компаниясымен бірлесіп электробустар шығаруды жоспарлап отыр. Бұл туралы Astana Group компаниялар тобының төрағасы Нұрлан Смағұлов Үкімет отырысында мәлімдеді.
«Дизельді және газбен жүретін автобустардың өндірісін биылғы қараша айында бастаймыз. Электрлі автобустар BYD компаниясымен әріптестік аясында әзірленді және Blade аккумуляторларымен жабдықталады. Электробустар өндірісін 2027 жылдың наурыз айында іске қосу жоспарланып отыр», – деді Смағұлов.
Оның айтуынша, автобустар қытайлық технологиялық серіктестердің қатысуымен әзірленіп, әлемдік жетекші өндірушілердің құрамдас бөлшектері пайдаланылады.
«Автобустардың дизайнын әзірлеуге қазақстандық инженерлеріміз де тікелей қатысты. Өндіріс Қазақстан аумағындағы өз зауытымызда жүзеге асырылады. Бұл – бірегей бренд. Зияткерлік меншікке қатысты барлық құқық біздің компанияға тиесілі болады», – деді ол.
Astana Motors – Astana Group холдингінің құрамына кіретін қазақстандық автомобиль өндіруші компания. Оның өндірістік құрылымына Hyundai Trans Almaty коммерциялық техника зауыты, Hyundai Trans Kazakhstan жеңіл автокөлік зауыты, автокомпоненттер технопаркі (автокөлік орындықтары мен мультимедиялық жүйелер өндірісі), сондай-ақ Алматы қаласында орналасқан Astana Motors Manufacturing Kazakhstan толық циклді зауыты кіреді. Бұл кәсіпорында Chery, Changan, сондай-ақ Great Wall Motor компаниясының Haval және Tank маркалы автокөліктері шығарылады.
