Берлин. 21 шілде. ИНТЕРФАКС – Германия мен Ұлыбритания қорғаныс саласындағы ынтымақтастықты кеңейту аясында 2034 жылға дейін нысаналарды 2 мың шақырым қашықтықтан жоя алатын қанатты зымыран әзірлеуді жоспарлап отыр. Бұл туралы Welt басылымы дереккөздерге сілтеме жасап хабарлады.
Басылым мәліметінше, Deep Precision Strike (DPS) («Терең дәл соққы») атты құпия бағдарлама Германия мен Ұлыбритания арасындағы әскери-техникалық ынтымақтастықтың негізгі жобасы саналады.
«2034 жылға қарай тараптар ұшу қашықтығы 2 мың шақырымға жететін жаңа зымыранды әзірлеуді көздеп отыр», – деп жазады Welt.
Басылымның хабарлағандай, Ұлыбритания бұл бағдарламаны Анкарада өткен НАТО саммитінде таныстырған. Жобаға жалпы 12 мемлекет қатысады, ал Германия негізгі рөлдердің бірін атқарады. Бағдарламаның болжамды құны 35 млрд еуроны құрайды.
Ақпаратқа сәйкес, сынақтан зымыранның екі нұсқасы өткізіледі. Оның бірі әуе шабуылына қарсы қорғаныс жүйелерін айналып өту үшін төмен биіктікте ұшуға арналған болса, екіншісі дыбыс жылдамдығынан бес есе жоғары жылдамдықпен ұшатын гипердыбыстық нұсқа болады.
Welt басылымының бағалауынша, DPS жобасы Еуропаның әскери салада АҚШ-қа тәуелділігін біртіндеп азайтуға бағытталған саясаттың символына айналуы мүмкін. Дегенмен қазіргі таңда Еуропа елдерінің алыс қашықтықтағы нысаналарға соққы жасауға арналған мүмкіндіктері шектеулі екені атап өтіледі.
Қазір Германия мен Ұлыбритания артиллериялық жүйелерді, танк зеңбіректерін, атыс қаруын және суасты дрондарын өндіру бағытында бірлесіп жұмыс істеп келеді.
