Вашингтон. 21 шілде. ИНТЕРФАКС – АҚШ Қорғаныс министрлігі Иранға қарсы әскери операцияға байланысты қарулы күштердің жауынгерлік әзірлігін қамтамасыз етуге арналған қаражат тапшылығына жақын қалды. Бұл туралы The Washington Post газеті дереккөздерге сілтеме жасап хабарлады.
Басылымның мәліметінше, АҚШ Конгресінің мүшелері, қазіргі және бұрынғы шенеуніктер Пентагонның бюджетінде шұғыл шешуді қажет ететін тапшылық мәселесі туындағанын айтып отыр. Олардың пікірінше, бұл жағдайдың негізгі себептерінің бірі – Иранға қарсы әскери іс-қимылдар, ал бірқатар маңызды қаржыландыру көздері алдағы апталарда толық сарқылуы мүмкін.
The Washington Post мәліметінше, қаржы тапшылығының салдарынан Пентагон әскери дайындық бағдарламаларын, әскери техниканы жөндеу мен күтіп ұстау жұмыстарын, сондай-ақ жауынгерлік әзірлікті қамтамасыз ететін өзге де бағыттарды қысқартуға мәжбүр болған. Бұл туралы қазіргі және бұрынғы төрт мемлекеттік қызметкер мәлімдеген.
Бұған дейін Ақ үй Конгрестен әскери операция шығындарын өтеу үшін қосымша 67 млрд АҚШ долларын бөлуді сұраған болатын. Алайда америкалық бұқаралық ақпарат құралдарының хабарлауынша, бұл қаржы пакетін мақұлдау үдерісі созылып кетуі мүмкін.
Сейсенбі күні АҚШ Қорғаныс министрі Пит Хегсет пен Біріккен штаб бастықтары комитетінің төрағасы Дэн Кейн Сенаттың бюджет қаражатын бөлу жөніндегі комитетінде осы бастаманы қолдап сөз сөйлемек.
Өкілдер палатасындағы республикашылдар да қосымша қаржы бөлуді жеделдетуге тырысуда. Осы аптада Палата Пентагонға тағы 73 млрд доллар бөлуге мүмкіндік беретін заң жобасын қарауы ықтимал. Алайда бұл бастама Сенатта қарсылыққа ұшырауы мүмкін.
Бұған дейін Ақ үйдің Әкімшілік және бюджет басқармасының директоры Рассел Воут конгрессмендерге Иранға қарсы әскери іс-қимылдардың құны шамамен 30 млрд доллар болғанын мәлімдеген. Дегенмен тәуелсіз сарапшылар нақты шығын бұдан әлдеқайда жоғары болуы мүмкін деп есептейді. Олардың айтуынша, бұл сомаға Иран соққыларынан Таяу Шығыстағы америкалық әскери базаларға келтірілген ықтимал залал кірмеген.
Сонымен қатар Конгрестегі екі дереккөздің айтуынша, АҚШ Әскери-теңіз күштері мен Әуе күштерінің қазіргі операцияларын қаржыландыруға арналған 2026 қаржы жылындағы қаражат шілде айының соңына қарай таусылуы мүмкін.
Газет дереккөздерінің мәліметінше, қаржы тапшылығын жабу үшін Пентагон қаражатты қайта бөлуді бастап кеткен. Соның аясында бірқатар әскери оқу-жаттығулар қысқартылып немесе кейінге шегерілген, сондай-ақ әскери техникамен жабдықтау, әскери нысандарды күтіп ұстау, жөндеу және қызмет көрсету шығындары да азайтылған.
Бұдан бөлек, Пентагон Конгрестен әскери дайындық пен қару-жарақ сатып алуға қарастырылған 4,3 млрд долларды басқа басым бағыттарға қайта бағыттауға рұқсат сұраған. Алайда заң шығарушылар бұл өтініш бойынша әзірге шешім қабылдаған жоқ.
Бұған дейін Пит Хегсет АҚШ-та оқ-дәрі қоры бойынша мәселе жоқ екенін мәлімдеген болатын. Соған қарамастан, The Washington Post дереккөздерінің айтуынша, Пентагон қызметкерлері бейресми әңгімелерде Иранға қарсы операция барысында жұмсалған оқ-дәрі қорын толықтыру үшін қомақты қаражат қажет болатынына алаңдаушылық білдіруде.
Газеттің мәліметінше, АҚШ-тың биылғы қорғаныс бюджеті біржолғы 150 млрд долларлық қаржыландыруды қоса есептегенде шамамен 1 трлн долларды құрайды. Ал әкімшілік 2027 қаржы жылына арналған қорғаныс бюджетін 1,5 трлн долларға дейін ұлғайтуды ұсынып отыр. Бұл бастама республикашылдар мен демократтар арасында да пікірталас туғызуда. Өйткені мұндай өсім мемлекеттік қарыздың артуына әкелуі мүмкін, ал қоғамдық сауалнамалар нәтижесі бойынша АҚШ-тың Иранға қарсы әскери іс-қимылдары америкалық қоғам тарапынан кең қолдау таппай отыр.
