Вашингтон. 8 тамыз. INTERFAX – Хуситтер Сауд Арабиясына Иранның нұсқауымен емес, Йеменге қойылған блокаданы алып тастау мақсатында соққы жасап жатқанын мәлімдеді. Бұл туралы хуситтердің саяси бюросының мүшесі Наср әд-Дин Амер CNN телеарнасына берген сұхбатында айтты.
CNN мәліметінше, ол жұма күні кешке қозғалыстың Сауд Арабиясымен қақтығысты күшейту үшін Тегеранның нұсқауына мұқтаж емес екенін мәлімдеген.
Хуситтердің саяси бюросы мүшесінің айтуынша, Эр-Риядтың хуситтер бақылауындағы Йемен аумақтарына енгізген экономикалық және әуе блокадасы ауыр гуманитарлық дағдарысқа алып келген.
«Осының өзі бізге неғұрлым батыл әрекет ету үшін жеткілікті негіз. Біз солай істеп жатырмыз. Бұдан басқа себеп іздеудің қажеті жоқ», – деді ол.
Наср әд-Дин Амердің айтуынша, корольдікке жасалатын соққыларды тоқтату үшін Эр-Рияд Йеменге қойылған блокаданы алып тастауы тиіс. Ол осы аптада Сауд Арабиясы әскеріне жасалған шабуылдарды алдын алу шарасы деп атап, корольдік Йеменде құрлықтағы әскери операцияға дайындалып жатқанын мәлімдеді.
Шілде айында хуситтер мен Сауд Арабиясы өзара соққы жасауды қайта бастады. «Ансар Алла» қозғалысының өкілдері Сауд Арабиясы порттарына теңіз блокадасын жариялап, Қызыл теңізде корольдікке тиесілі сегіз танкерге шабуыл жасады. Кейін Сауд Арабиясы аумағындағы мұнай инфрақұрылымы нысандарына соққы жасалғанын мәлімдеді. Сондай-ақ хуситтер мен Йемен үкіметінің әскері арасында өзара шабуылдар болғаны туралы ақпарат тарады.
Шілде айының соңында The Guardian басылымы дереккөздеріне сілтеме жасап, Сауд Арабиясы Қызыл теңіздегі порттарына қойылған блокаданы алып тастау мақсатында хуситтерге қарсы ауқымды әскери науқан бастауға дайындалып жатқанын хабарлады. Басылымның мәліметінше, әскери шаралар құрлықтағы операцияны да қамтуы мүмкін.
