Токио. 12 қараша. ИНТЕРФАКС – Оңтүстік-Шығыс Азия елдері қауымдастығына (АСЕАН) мүше мемлекеттер 2027 жылы мұнай өнімдерінің бірлескен резерв жүйесін іске қосуды жоспарлап отыр. Бұл жүйе төтенше жағдайларда елдердің өзара мұнай өнімдері қорын пайдалануына мүмкіндік береді, деп хабарлады жапониялық Nikkei басылымы.
Жоспар бойынша Индонезия мен Таиландта мұнай өнімдерін сақтайтын қоймалар құрылады. Алғашқы кезеңде Филиппин төтенше жағдай туындаған кезде осы қоймалардағы дизель отыны мен бензинді сатып ала алады. Сенбі күні Филиппиннің мемлекеттік PNOC мұнай компаниясымен байланысты кәсіпорындар Индонезия мен Таиландтағы мұнай қоймаларының операторларымен ниет туралы келісімдерге қол қояды деп күтілуде.
Бастама аясында «билет» жүйесі енгізіледі. Бұл тетік бойынша қатысушы мемлекеттер немесе компаниялар төтенше жағдай кезінде қоймаларда сақталған, басқа елдің компанияларына тиесілі мұнай өнімдерінің белгілі бір көлемін сатып алу құқығы үшін алдын ала төлем жасайды. Nikkei басылымының мәліметінше, мұндай жүйе Еуропалық одақта да қолданылады.
Алдағы уақытта жаңа жүйе мұнай қорларына да қолданылуы мүмкін.
Жаңа жүйені құру жұмысын АСЕАН және Шығыс Азия экономикалық зерттеулер институты (ERIA) үйлестіріп отыр. Бұл халықаралық талдау орталығы Индонезияда Жапонияның Экономика, сауда және өнеркәсіп министрлігінің бастамасымен құрылған.
Таяу Шығыстағы соғыс салдарынан энергия ресурстарын жеткізуде іркілістер туындағаннан кейін Жапония билігі аймақтың энергетикалық қауіпсіздігін нығайту шараларын қолға алуға ұмтылып отыр. Жапония премьер-министрі Санаэ Такаити 17 қарашада Манилада өтетін салалық саммитте АСЕАН елдерінің мұнай өнімдерін резервке жинақтау саласындағы ынтымақтастығы туралы мәлімдейді деп күтілуде.
