Астана. 12 қараша. ИНТЕРФАКС-ҚАЗАҚСТАН – «Самұрық-Қазына» мемлекеттік қоры инвесторлар, кредиторлар және іскерлік серіктестер алдындағы міндеттемелерін толық сақтайды. Қор тобына кіретін барлық компаниялар қалыпты режимде жұмысын жалғастырып жатыр. Бұл туралы бейсенбі күні таратылған қордың мәлімдемесінде айтылды.
«Инвесторлар, кредиторлар, халықаралық қаржы институттары және іскерлік серіктестер алдындағы барлық міндеттемелер күшінде қалады әрі қолданыстағы келісімдердің талаптарына сәйкес орындалады», – делінген мәлімдемеде.
Қор бұл мәлімдемені Қазақстанның Ұлттық қауіпсіздік комитеті (ҰҚК) «Самұрық-Қазына» басқарма төрағасы Нұрлан Жақыповтың, «Қазақстан темір жолы» ұлттық компаниясы» АҚ (ҚТЖ) басқарма төрағасы Елжас Өтіншіевтің және сыбайлас жемқорлық қылмысын жасады деген күдікке ілінген басқа да адамдардың ұсталғаны туралы хабарлаған күннің ертеңіне жариялады.
ҰҚК мәліметінше, күдіктілерді 11 қарашада Сыбайлас жемқорлыққа қарсы іс-қимыл қызметі ұстаған. Ведомство қылмыстық істің барлық мән-жайын анықтау мақсатында тергеу амалдары жүргізіліп жатқанын хабарлады. Сотқа дейінгі тергеп-тексеру барысына қатысты өзге ақпарат Қылмыстық-процестік кодекстің 201-бабына сәйкес жария етілмейді.
Бұған дейін әлеуметтік желілерде Астанадағы тұрғын үй кешендерінің бірінің терезесінен доллар бумалары салынған чемодандар мен сөмкелердің лақтырылғаны түсірілген бейнежазбалар тараған болатын. Чемодандардың бірі жерге құлаған кезде ашылып кетіп, ішіндегі ақша аулаға шашылған. Қазақстандық бірқатар БАҚ бұл оқиғаны қор мен ҚТЖ басшыларының ұсталуымен байланыстырды. Алайда мұндай байланысты растайтын ресми ақпарат жарияланған жоқ.
Жақыпов «Самұрық-Қазына» қорын 2025 жылдан бері басқарып келеді. Қор Қазақстанның мұнай-газ, көлік-логистика және энергетика салаларындағы стратегиялық активтерін басқарады.
Өтіншіев 2026 жылғы шілдеде Талғат Алдыбергеновтің орнына ҚТЖ басқарма төрағасы болып тағайындалды. Бұған дейін ол 2023 жылғы сәуірден бастап «Самұрық-Қазына» қорының стратегия және активтерді басқару жөніндегі басқарушы директоры – басқарма мүшесі қызметін атқарған.
ҚТЖ Қазақстанның магистральдық теміржол желісінің операторы болып саналады. Компанияның жалғыз акционері – «Самұрық-Қазына» қоры. ҚТЖ 2026 жылы акцияларын бастапқы жария орналастыруды (IPO) жоспарлап отыр.
