Астана. 24 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев бір палаталы Құрылтай депутаттарының алғашқы сайлауының өтуіне байланысты құттықтау жолдаған Ресей, Қырғызстан, Әзербайжан, Өзбекстан және Тәжікстан басшыларына алғыс білдірді. Бұл туралы Ақорданың баспасөз қызметі хабарлады.
«Президент Қасым-Жомарт Тоқаев егемен Қазақстан тарихында алғаш рет бір палаталы Құрылтай сайлауының табысты өтуіне орай жылы лебізін білдірген әріптестері – Ресей Президенті Владимир Путинге, Қырғызстан Президенті Садыр Жапаровқа, Әзербайжан Президенті Ильхам Әлиевке, Өзбекстан Президенті Шавкат Мирзиёевке және Тәжікстан Президенті Эмомали Рахмонға алғыс айтты», – делінген дүйсенбі күні таратылған хабарламада.
Мемлекет басшысы парламент сайлауы Қазақстан азаматтарының елдік мәселелерге жауапкершілікпен қарайтынын, бірлігі мен азаматтық ұстанымының берік екенін көрсетті деп бағалады. Сондай-ақ сайлаушылардың елдің, әсіресе өскелең ұрпақтың болашағына бейжай қарамайтынын атап өтті.
Тоқаевтың пікірінше, Қазақстанды жан-жақты жаңғырту, саяси және экономикалық реформаларды жалғастыру ел дамуының тұрақты бағытына айналды. Құрылтай сайлауының қорытындысы бұл өзгерістерді азаматтардың басым көпшілігі қолдайтынын көрсетті.
Қазақстан Президенті достас мемлекеттердің басшыларына елдерін орнықты дамытуға бағытталған жоспарлары мен бағдарламаларын жүзеге асыруда табыс тіледі.
Тоқаевтың атына бірқатар халықаралық ұйым басшыларынан да құттықтау жеделхаттары келіп түсті. Олардың қатарында Шанхай ынтымақтастық ұйымы, Тәуелсіз Мемлекеттер Достастығы, Ұжымдық қауіпсіздік туралы шарт ұйымы, Еуразиялық экономикалық одақ, Экономикалық ынтымақтастық ұйымы және ТҮРКСОЙ бар.
Қазақстанның жаңа бір палаталы парламенті – Құрылтай депутаттарының алғашқы сайлауы өткен жексенбіде өтті. Орталық сайлау комиссиясының алдын ала мәліметі бойынша, сайлаушылардың 74,08%-ы дауыс беруге қатысты.
Құрылтайға өту үшін белгіленген 5 пайыздық межеден сайлауға қатысқан жеті партияның бесеуі өтті. «Әділет» партиясы 71,17%, «Ауыл» – 6,26%, Respublica – 5,56%, «Ақ жол» – 5,21%, Жалпыұлттық социал-демократиялық партия 5,11% дауыс жинады.
Құрылтай 145 депутаттан тұрады. Депутаттар бірыңғай жалпыұлттық сайлау округі бойынша партиялық тізімдер негізінде пропорционалды жүйемен сайланады.
