Лондон. 25 тамыз. ИНТЕРФАКС – Биыл жазда Еуропаны жайлаған қалыптан тыс ыстық салдарынан әдеттегі көрсеткіштен кемінде 35 мыңға артық өлім тіркелді. Бұл туралы сейсенбі күні The Guardian хабарлады.
Ең көп адам шығыны Германияда тіркелген. Мұнда күннің шамадан тыс ысуынан шамамен 14 мың адам қайтыс болған. Францияда әдеттегі деңгейден 7,3 мыңнан астам артық өлім тіркелсе, Испанияда жоғары температураның салдарынан 5 мыңға жуық адам көз жұмған. Италияда бұл көрсеткіш 5 мыңнан 8 мың адамға дейін жетеді.
Ұлыбритания, Бельгия және Нидерландта қалыптан тыс ыстықтан қайтыс болғандардың жалпы саны 5 мыңға жуықтаған.
Артық өлім-жітім дегеніміз – белгілі бір кезеңде қайтыс болғандар санының қалыпты жағдайда күтілетін көрсеткіштен артуы. Бұған ауа райының қалыптан тыс құбылыстары, қарулы қақтығыстар немесе ашаршылық сияқты сыртқы факторлар себеп болуы мүмкін.
Басылым бұл деректер Еуропа елдерінің тек жартысын қамтитынын әрі тамыз айында тіркелген өлім-жітім толық есепке алынбағанын атап өтті. Сондықтан түпкілікті көрсеткіш бұдан едәуір жоғары болуы мүмкін.
Дүниежүзілік денсаулық сақтау ұйымының мәліметінше, соңғы 20 жылда Еуропада шамадан тыс жоғары температурадан болатын өлім-жітім 30%-дан астам өскен. Климаттың өзгеруіне байланысты бұл көрсеткіш алдағы уақытта да арта береді деген болжам бар.
Мамыр айында Еуропаның бірқатар елінде күн күрт ысып, температура рекордтары жаңарды. Кей жерлерде ауа температурасы 40 градусқа жетіп, тіпті одан да асты. Қатты ыстық Франция, Испания және Италия бастаған бірнеше елде табиғи өрттердің шығуына себеп болды.
Еуропалық орман өрттері жөніндегі ақпараттық жүйенің дерегіне сәйкес, 2026 жылдың 25 тамызына дейін Еуропалық одақ аумағында 626,8 мың гектар жер өртенген.
