Токио. 26 тамыз. ИНТЕРФАКС – Халықаралық қылмыстық соттың (ХҚС) төрағасы Томоко Аканэ АҚШ-тың сотқа қысымы күшейген тұста Жапония оның қызметін қолдауға белсенді атсалысуы керек деп мәлімдеді.
«Жапония ұзақ жылдар бойы заң үстемдігін сыртқы саясатының негізгі қағидаларының бірі ретінде ұстанып келеді. Сондықтан халықаралық қауымдастық Жапониядан үлкен үміт күтеді», – деді Аканэ.
Оның айтуынша, Жапония ХҚС құрамындағы көршілес елдерге қолдау көрсетіп, олардың АҚШ қысымына байланысты соттан шығуына жол бермеуге күш салуы қажет.
«Жапонияның ХҚС-қа берік қолдау көрсетуі соттың алдағы тағдыры үшін аса маңызды», – деді ол.
Томоко Аканэ Жапонияда дүниеге келген. 2024 жылдың наурызынан бері Халықаралық қылмыстық сотты басқарып келеді.
Бұған дейін АҚШ Қаржы министрлігі Аканэге санкция салған. Шектеу шаралары прокурор Абдулай Сейге де қатысты енгізілді. АҚШ мемлекеттік хатшысы Марко Рубио бұл шешімді «америкалықтарды осы жалған соттан қорғау» саясатының бір бөлігі деп түсіндірді.
2025 жылғы ақпанда АҚШ президенті Дональд Трамп Халықаралық қылмыстық соттың АҚШ пен оның одақтастарына, соның ішінде Израильге қатысты әрекеттеріне байланысты санкция енгізу туралы жарлыққа қол қойған.
Халықаралық қылмыстық сот Рим статуты негізінде құрылған. Оның құзыретіне геноцид пен соғыс қылмыстарын жасаған адамдарды жауапқа тарту кіреді.
АҚШ Рим статутына қатысушы мемлекет емес. Осыған байланысты Вашингтон ХҚС-тың АҚШ азаматтарына қатысты істерді қарау құзыретін мойындамайтынын бірнеше рет мәлімдеген.
