АСТАНА. 4 қыркүйек. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев жұма күні Экология және табиғи ресурстар министрі Әлібек Қуантыровты қабылдады, деп хабарлады Мемлекет басшысының баспасөз қызметі.
«Кездесу барысында Президент министрліктің негізгі міндеттерін айқындап, орман алқаптарын қалпына келтіру жұмыстарын жалғастыруды, ұлттық парктердің инфрақұрылымын дамытуды және қалдықтарды қайта өңдеу арқылы тұйық циклді экономика қалыптастыруды тапсырды. Астана, Алматы және Шымкент қалаларында қалдықтарды энергетикалық кәдеге жарату зауыттарын салу және кейін бұл тәжірибені басқа өңірлерге тарату мәселесіне ерекше назар аударылды», — делінген Президент сайтында жарияланған хабарламада.
Сонымен қатар Мемлекет басшысы экологиялық мәдениетті арттыру және «Таза Қазақстан» бастамасын одан әрі тиімді жүзеге асыру маңызды екенін атап өтті.
Әлібек Қуантыров Қазақстанның Экология және табиғи ресурстар министрі қызметіне өткен бейсенбіде тағайындалған.
Бұған дейін қытайлық China Tianying Inc. компаниясының еліміздің үш қаласында қатты тұрмыстық қалдықтарды кәдеге жаратуға арналған бірнеше зауыт салуды жоспарлап отырғаны хабарланған.
Сонымен қатар қазір Астана, Алматы және Шымкент қалаларында осындай зауыттар салу жобалары жүзеге асырылып жатыр. Олардың жалпы құны 293,3 млрд теңгені құрайды. Зауыттардың жиынтық қуаты тәулігіне 4,5 мың тонна қалдықты өңдеуге және 134 МВт электр энергиясын өндіруге мүмкіндік береді. Жобаларды қытайлық Junxin Environmental Protection, EAST HOPE және Shaanxi Construction Engineering компаниялары жүзеге асыруда.
