АСТАНА. 11 қыркүйек. ИНТЕРФАКС-ҚАЗАҚСТАН – Қазақстанда 8 миллионнан астам адам дене шынықтырумен тұрақты айналысады. Бұл туралы Президент Қасым-Жомарт Тоқаев мәлімдеді.
«Қазір елімізде 8 миллионнан астам адам дене шынықтырумен тұрақты айналысады. Бұл халықтың жартысына жуық бөлігін құрайды», – деді Қасым-Жомарт Тоқаев Астанада өткен VI Дүниежүзілік көшпенділер ойындарының жеңімпаздары мен жүлдегерлерін марапаттау рәсімінде.
«Осы тұрғыдан алғанда, бізді салауатты ұлт деуге болады. Бірақ мұнымен тоқмейілсуге болмайды», – деді Президент.
Қасым-Жомарт Тоқаевтың айтуынша, соңғы жеті жылда елде 500-ден астам спорт нысаны салынып, бірқатар нысан жөндеуден өткен.
«Былтыр менің тапсырмам бойынша «Дене шынықтыру және спорт туралы» заңға бірқатар өзгеріс енгізілді. Жаңартылған заң отандық спорттың дамуына тың серпін береді. Бұл ұлттық спорт түрлерінің өркендеуіне де оң ықпал етеді деп сенемін», – деді Мемлекет басшысы.
Президент балалардың спортпен және дене шынықтырумен айналысуына ерекше мән беру қажет екенін атап өтті.
«Балаларымыз міндетті түрде спортпен немесе дене шынықтырумен айналысуы керек. Бұл – жарқын болашағымыздың кепілі. Осы мақсаттың жалпыұлттық маңызы бар. Өйткені рухы мен тәні әлсіз халық ешқашан озық әрі дамыған ел құра алмайды. Бұл – ақиқат», – деді Қасым-Жомарт Тоқаев.
Оның айтуынша, осы мақсатта спорт мектептеріндегі әр тәрбиеленушіге бөлінетін қаржы көлемі 233 мың теңгеден 415 мың теңгеге дейін, яғни екі есеге жуық көбейген.
«Былтыр 220 мыңнан астам бала мемлекет есебінен спорт секцияларына тегін барды. Осы мақсатқа 50 миллиард теңге бөлінді», – деді Президент.
