МӘСКЕУ. 11 қыркүйек. ИНТЕРФАКС – Франция экономикасына дәл қазір үлкен қауіп төніп тұрған жоқ. Алайда елдегі қаржы ахуалы алаңдатарлық, сондықтан Үкімет бюджет тапшылығы мен мемлекеттік қарызды азайтуға кірісуі қажет. Франция банкінің басшысы Эмманюэль Мулен осындай пікір білдірді.
«Францияға қауіп төніп тұр деуге негіз жоқ. Дегенмен алаңдауға себеп бар», – деді Еуропа орталық банкі (ЕОБ) Басқарушылар кеңесінің мүшесі Эмманюэль Мулен RTL радиосына берген сұхбатында.
Оның айтуынша, Франция үшін қазір ең өзекті мәселе – мемлекеттік қаржының жағдайын реттеп, бюджет тапшылығын төмендету.
Мулен ЕОБ-тың бейсенбіде пайыздық мөлшерлемелерді көтеру туралы шешіміне де тоқталды. Ол мұндай шешім қабылдағанда бір ғана елдің емес, бүкіл еуроаймақ экономикасының жағдайы ескерілетінін айтты.
«Еуроаймақтағы ахуал Франциядағы жағдайдан өзгеше. Экономикалық өсім жоғары, инфляция да әлі бәсеңдеген жоқ. Сондықтан шешім бүкіл еуроаймақтың жағдайына қарай қабылданады. Оның Францияға тиімді болатын кезі де, кері әсер ететін тұсы да бар», – деді ол.
Бір күн бұрын ЕОБ еуроаймақ экономикасының алдағы жылдардағы өсіміне қатысты болжамын жақсартты. Биылғы көрсеткіш 0,8%-дан 0,9%-ға, келесі жылға арналған болжам 1,2%-дан 1,4%-ға көтерілді.
Францияда, керісінше, экономикалық өсім баяулайды деген болжам бар. Елдің Insee ұлттық статистика институты биылғы өсім көрсеткішін 0,7%-дан 0,4%-ға дейін төмендетті. Бұған халық шығынының азаюы мен инвестицияның қысқаруы әсер еткен. Былтыр Франция экономикасы 0,9%-ға өскен еді.
Экономиканың баяулауы бюджет тапшылығын қысқартуды да қиындатады. Былтыр оның көлемі ЖІӨ-нің 5,1%-ына жеткен. Үкімет биыл бұл көрсеткішті 5%-ға дейін түсіруді жоспарлап отыр.
Мемлекеттік қарызға қызмет көрсету де қымбаттап барады. Муленнің айтуынша, пайыздық мөлшерлемелердің өсуі алдағы бірнеше жылда бюджетке түсетін салмақты едәуір арттырмақ.
«2028 немесе 2029 жылға қарай мемлекеттік қарызға қызмет көрсетуге жыл сайын 100 млрд еуро жұмсауымыз мүмкін», – деді ол.
Франциядағы солшыл күштердің президенттікке кандидаты Жан-Люк Меланшон елдің ұлттық орталық банк пен ЕОБ алдындағы берешегін есептен шығаруды ұсынған. Бұл ұсыныс Францияда үлкен пікірталас туғызды. ЕОБ президенті Кристин Лагард мұндай шешімді заң жүзінде жүзеге асыру мүмкін емес әрі оның қаржы жүйесіне қаупі бар екенін айтты.
Эмманюэль Мулен де бұл ұсынысты қолдамайды. Оның сөзінше, қарыз міндеттемелерінен бас тарту Францияның еуроаймақтағы орнына күмән келтіретін қадам болмақ.
«Бұл заңға қайшы әрі өте қауіпті. Мұндай шешім инфляцияны үдетіп, пайыздық мөлшерлемелерді одан әрі өсіреді. Франция 1797 жылдан бері дефолтқа жол берген емес. Ал мемлекеттік қарызды өтеуден бас тарту – дефолт жариялаумен тең», – деді Мулен.
